智取大市：花旗股市未見頂 - 晉佳
美股未見頂其中一個理由，就係新興市場極度落後，資金最後由美股轉去港股，先夠超買。 資料圖片
10年期及2年期美債孳息率息差反彈，觸發美股調整，究竟係2月初跌市嘅小型版？定係美股熊市開端？將視乎息差有否快速擴大。踏入今年，息差一擴大美股就調整，從2月
上旬、4月下旬同5月中下旬走勢睇，相當可靠。
息差反彈，多數屬短期，十日八日內會再度由擴闊變為收窄，美股調整亦隨之結束。如果孳息率息差再度收窄，下一步就會向零、甚至負數進發，即係孳息率曲線倒掛。
今次美債息差反彈令美股下跌，點解估計非熊市開端？因為件事由鮑威爾言論觸發，照計冇聰明人咁蠢同願意為一句說話成為千古罪人。聯儲局8月下旬就孳息率曲線倒掛做咗份調查，發現信貸經理會收緊借貸條件嚟防風，證明市場未夠超買，鮑威爾言論證明聯儲局對倒掛有所準備。
孳息率曲線倒掛象徵流動性惡化同經濟衰退，呢種不正常情況往往難持久，多年來孳息率倒掛以至美股長線見頂嘅時間差，平均11個月，美股見頂往往遲過倒掛出現。
美股未見頂仲有一個理由，就係新興市場極度落後，資金最後由美股轉去港股，先夠超買。但顧掂十月先，人行降準為頂住A股復市，只能作為一小扇逃生窗，不提也罷。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
