【大茶飯】指數高低對你的意義（青冰）
道指上周曾升越恆指，傳媒舖天蓋地的報導，說這是自沙氏以來首次，港股氣氛差，市場充斥著避港股則吉，棄港赴美日的情緒，在自己能力範圍以內，分散投資，青冰絕對贊同，本著廣闊的胸襟去睇市，於己有益，冇話玩邊個市場就叻啲醒啲，情況就如去年揸住騰訊(0700)的
人，總會恥笑身邊人，買咁多分析咁多其他股做乜吖，浪費時間，有「訊念」就日日贏啦。
其實道指高過恆指，對普羅股民是否重要呢？或許跟騰訊有莫大關係，作為過去兩年的升市火車頭，恆指就是騰指，但再睇返15年的大時代，相信唔少戰友都記得，恆指只係由約22000點升到28588點，不過當年真係雞犬皆升，尤以中小型股最堅，相信當年旺市時求其問一個股民，佢都唔會在乎個恆指係幾多點。
唔少人用十年走勢為兩個指數比較，道指由雷曼低位升了316%，恆指升了213%，咁比真係曳啲，但你又唔好忘記，當年的危機是由美國爆發，跌到反艇係理所當然，情況有如香港爆發沙氏時死城一般，恆指最低係8331點，如果由當日計，恆指係跑贏道指啊。
話說回頭，青冰仍相信道指長遠表現仍會較優，先不論經濟因素及貿易戰的影響，就以指數本身的新陳代謝，就已高下立見。道指揀股總以行業代表性為先，市值為次，科技股其實唔多，蘋果都係2015年才加入，其他FANG，只能望門輕嘆。恆指個設計就係以市值為先，選股根本跟唔上時代，近年加入的股票，染藍就似是見頂日，你睇瑞聲(2018)、舜宇(2382)、石藥(1093)及中國生物製藥(1177)，市值由一二百億起步，炒到過千億先有足夠「代表性」，Sorry，可能已經是行業周期頂部了。恆指裡金融及地產股各有11隻，比重分別是48%及10%，環顧全球，那有單一行業會佔指數半璧江山呢？既然全部地產大孖沙只等於一隻騰訊，又何必keep十一隻咁多呢?
長年以來，表現最好的，都是一眾公用股，無論你是月供或是分段吸納，回報也遠勝其他成份股，奈何他們只佔恆指5%比重，支撐作用不大，常有朋友說月供盈富(2800)回報好，青冰心想除咗不用印花稅之外，公用股可以講係冇得輸。
散戶較基金優勝之處，就是靈活及轉身快，揸cash應付熊市，基金唔得你卻可以，滿倉騰訊及藥股，九成基金都會不變應萬變，散戶肯止蝕就已經跑贏曬基金及盈富了，更何況恆指今年仍有十一隻股票升，漲一成以上的更有六隻，所以又何必拘泥指數之高低，不如用心揀股好過啦。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
