金手指 - 孫柏文 2018年11月13日
金手指：俄鋁正常化欠東風 - 孫柏文
美國制裁俄鋁嘅落實日一改再改，上周末已第六次改，到一月大限到時，究竟落實、取消、再推遲，邊樣機會最高呢？資料圖片 適中字型 較大字型
「喂孫柏文！究竟美國政府幾時會撤銷對俄鋁（486）嘅制裁？」我喺fb近乎每日都會收到類似嘅fan屎訊息。近期，每次我收到時，我就會答：「俄鋁都冇被制裁，點撤銷呢？」可能呢個答案，對有心問我嘅fan屎們實在太玩嘢，所以，佢哋唔會再搵我，或者完全ignore我嘅反問。
不過，我個反問係百分百認真嘅。美帝一向以來，都只係話會喺某年某日落實制裁，但落實日一改再改，上周末已第六次改，咁合理預期係咪會有第七、八、九、十次呢？即係俄鋁嘅制裁，唔會落實啦！
咁填鴨式教育產物的你會問：「就算冇落實，淨係個威脅都一定有實質影響！如果唔係，股價唔會之前5蚊樓上，𠵱家得番兩個幾？」
係，真係有實質影響。不過首先，佢生產、出貨、收錢、出糧、買機器原料等，上周出嘅業績裏，已證明回復到5蚊一股時嘅狀態。咁之後繼續不斷推遲制裁落實，變相永不落實，公司運作就永冇影響。
不過點解兩蚊股呢？一，大行、銀行繼續唔畀客買俄鋁股票，壓低需求。二，作為投資者買資產時，如學股神畢菲特咁，諗住揸到永遠，嗰件資產要有派息，而俄鋁最衰嘅地方，係之前會喺中期業績派曬一年嘅息。不過因今年中期公司被制裁威脅大震盪，佢哋冇派。
我諗真係會繼續不斷推遲制裁落實，公司運作會如常。即萬事俱備，只欠派息呢股東風，市場就會視佢為間正常公司，用正常股值去計，唔似𠵱家3倍PE。當然，美帝宣佈完全取消制裁會易好多，不過推遲六次，你覺得最新一月大限到時，落實、取消、再推遲，邊樣機會最高呢？
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com
