大棋局 - Mr. Tregunter 2018年11月13日
大棋局：中國輪迴日本宿命 - Mr. Tregunter
中國經濟已被樓市騎劫，2017年全國賣地收入5.2萬億人民幣，佔地方政府公共預算56%。資料圖片 適中字型 較大字型
中國會否輪迴日本宿命，成為另一個資產泡沫爆破後迷失30年的國家，經常被拿來討論。明年就係日本經濟迷失30周年。1989年最後一個交易日，日經指數升到38957.44點，係歷史上會當淩絕頂一刻。但由嗰刻開始，日經指數就從來冇再見過這組數字。1年之後，日本樓價連跌27年。
康德拉季耶夫經濟周期為48至60年，若分前後兩個階段，一半即24至30年。就喺日本步入經濟迷失30周年之際，日本國土交通省公佈，截至今年上半年，全國平均地價按年上漲0.1%，係1991年樓市爆煲後第一次錄得增長。日經指數亦企穩20000點，重回90年代水平。日本經濟迷失時代，係咪有機會出現轉折，甚至步向終結？
另一邊廂，日本西面800公里外的中國，1989年正面對經濟制度改革所產生的震盪。經濟問題係最易刺激平民覺醒民主的重要，結果六四事件以鎮壓流血收場，鄧小平心底裏知道，再唔改革真係玩完，於是南巡，警告「誰不改革，誰就下台」。後遺症是，這30年中國都在培養一種邏輯，只要搵到錢就證明做對，更準確說，是非對錯他媽的不重要。但由現在開始，中國經濟走下坡，各種倒果為因的荒謬邏輯將變成作繭自縛的蠶絲。
樓價滙價不可兼得？
日本土地神話爆破前，樓價係GDP 400%；中國現時總樓價估計為430萬億人民幣，2017年GDP 82萬億人民幣，總樓價已超過GDP 500%。令樓市泡沫軟著陸的其中一個方法，就係貨幣貶值。比如津巴布韋一條麵包賣1億津幣，聽落嚇死，但如1億津幣只可兌1美元，咁就唔貴。所以樓價同滙價就好似林志玲同侯佩岑，兩個只能揀一個。
美國80年代用《廣場協議》刺破日本樓市泡沫，日圓不單止唔貶，更加大升。中國目睹日本前車可鑒，一度認為自己睇住嚟行冇可能犯同樣嘅錯。於是，在美國多年壓力下，人民幣始終冇放手大升。但現在美國人選了個特朗普，以貿易戰作為缺口，人民幣如果大貶就係滙率操控國。中國經濟已被樓市騎劫，2017年全國賣地收入5.2萬億人民幣，佔地方政府公共預算56%。樓價唔跌得，滙價唔敢貶，即係林志玲你要侯佩岑你又要，有冇咁著數？
日本經濟迷失30年，出現17個諾貝爾獎得主；中國高速發展30年，卻出現以億計氣吞山河的大媽。如果經濟迷失30年，大媽可以變諾獎得主，呢單生意做得過。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
