博有線不如平執招行
2018年11月13日
港股觀望重磅股騰訊(700) 業績，指數高開後呆呆滯滯，無力上升，加上人民幣偏軟，投資者取向保守。
喺呢個氣氛下，有線電視(1097) 公佈抽水。呢個建議中環茶友都唔覺得意外，因為自從九倉(004) 嫁女貼大牀，半賣半送畀老虎仔邱達昌財團後，茶友已
經話出名數口精嘅九倉老闆吳光正肯咁蝕底，皆因佢知呢盤生意要不斷泵水，壯士斷臂雖然痛，都好過拖落去。以佢當時手頭資金，玩一兩年應該就要集資。呢兩個月有線股價炒起，有人仲胡亂安個理由落去，話中國移動同佢合作，會畀錢養起有線，搞到街外人有無限憧憬。有線老闆見隻股難得脫離仙班，叫做稍為有價，仲唔趁勢抽水，唔通真係等運到咩。
大股東捱義氣包銷
今次有線建議以每股0.109元進行一供一供股計劃，供股價較上周五收市股價0.177元，折讓38.4%，集資不多於6.91億元。公告指出，大股東永升(亞洲)持有43.2%股份，已承諾悉數供股並同意有條件包銷股份。若小股東不供股，大股東將在供股完成後，持股擴大至71.6%。
有線預計，是次供股集資淨額至少6.6億元，當中1.4億元將用作改善硬件設施，包括增強網絡基礎設施及廣播設備等；約3.5億元用作外購及製作節目，其餘撥作一般營運資金等。
今次有線以0.109元集資，坦白講價錢唔算平，當隻股過去幾個月借住消息炒上，股價只得幾個仙，根本好難集資，若然要籌幾億元，可能要更大比例去供股，從呢個角度講，O依家供股價唔可以話平。
呢次供股價唔平，但大股東仍然肯包銷，有茶友覺得大股東都算肯捱義氣。不過，從過往經驗，若然供股搵到街外人包銷，咁即係市場覺得供股價有吸引力，有點炒賣概念，甚至安排左人去炒。呢次供股大股東要包銷，左睇右睇又唔似大股東想藉此低價增持，所以供股對小股東都唔係咁好玩，結果股價一公佈，有線即刻散左，收市勁跌29.4%，報0.125元。
喺O依家呢啲弱市，投資者子彈有限，點用真係要諗過，如果見有線跌左去供股或低撈，咁不如諗諗有無其他更好投資。好似呢兩日內銀股因為阿爺要求增加民企信貸跌咗落嚟，如果有錢，不如考慮平執內銀好過。
內銀股同有線，表面睇無乜相關，但係股票市場，所有買賣都牽涉機會成本，若然將錢投資喺啲前景難以看好的股票，等於錯失另一啲賺錢機會。呢兩個交易日內銀股受壓，主要係中央提出要扶持民企，要求銀行增加借貸，市場擔心銀行呆壞帳風險增多。從大氣候而言，此說不是沒有道理。但是，中央推動向民企放款，都有刺激經濟同盤活市道作用。若然銀行一味收縮信貸，經濟向下，保守的貸款政策最後都難保無損失。
點睇都好，中央要求銀行貸款政策已經見光，內銀股即時調整消化呢個消息。對投資者而言，呢個亦係一個機會去買入應對政策較佳的公司。簡單來說，好似過去四年，招商銀行(3968) 表現都跑贏同行，喺消息公佈後股價回調較多，相信係因為佢升得高啲，估值比較貴。但有理由相信，招行喺經營層面往績較其他內銀好，喺應對增加民企信貸政策都會做好啲，所以趁回落去買呢類優質股，比貪平買有線呢類面對艱難前景嘅股份為佳。以招行為例，昨日佢升0.79%，收報32元。若然有機會插穿30元，市盈率大約有9倍，息率有3.4厘，都有一定吸引力。
大行唱淡 騰訊表現曳
港股昨日等騰訊派成績表，交投大減，恒指收報25633點，升31點；國企指數收報10440點，升8點，成交只有731億元。騰訊(700) 績前被多間大行唱淡下跌3%，收報270.6元。高盛昨日都加入唱淡騰訊戰團，指騰訊手遊、線上廣告、支付業務增長放緩，加上中國政府對遊戲加強監管，拖累遊戲變現能力，將騰訊目標價由476元大削至397元，維持「買入」評級。
陸羽仁
金融High Tea 舊文
來源 source: http://hdfin.stheadline.com
