【笑到最後】強迫金也送中 - 高明
有朝一日，香港打工仔的血汗錢被利用「中央強迫金」名義，嚟完成國家任務，恐怕到時大家只能含笑供款。 資料圖片
強迫金由2000年開始運作至今，已累積逾九千億元。由一個成立時人人喊打嘅系統，演化成別有用心之人日夜謀住嘅小金庫，所以有少數派放風，話要「政府
中央管理強積金」。經歷過2019年，到𠱁咗人落疊後，就會變成「中央政府管理」、筆錢自古以來都唔屬於香港人。
強迫金最大問題，在於無法正常使用自己嘅錢，要強迫人供去指定嘅迫金。少數派將訴求扭曲成不滿管理費貴，並且抹黑市民唔識揀，政策上嘅體現就係推出半自由行（降低管理費），同預設投資策略（政府代市民決定投資策略），當然以上無法解決管理費貴嘅問題。
美國退休基金2019年平均開支由0.6%下降至0.55%，而美股ETF更只係0.03%管理費，強積金平均開支1.44%。如果「管理費平」真係政策目的，使用人哋嘅退休金制度，又或容許月供美股ETF，開放一條名單，打工仔可以轉曬過去，直接享受低管理費，以現今科技執行同監察完全做到。唔單止基金開支平咗，未來回報亦肯定好過強積金，因為基金開支每多1%，10年回報差不多蠶食近一成，而美股嘅回報本身遠勝其他地區股票。
至於放風嘅「中央強迫金」，由圍標變成壟斷，原則上更無需要平賣，執行上高明可以肯定，砌數都會砌到極低管理費，宣稱解決咗香港其中一個深層次矛盾，然後就會買一帶一路、亞投行、海南金融中心等嘅垃圾資產，並且會有少數派衝出嚟要求打工仔感恩國家畀機會你投資，而反對就係違法嘅事。慳咗管理費，犧牲咗本金，變成更差嘅結果。
以往中央養老金及社保基金入市，本地散戶拍曬手掌，因為用人哋啲錢去救自己荷包。有朝一日用「中央強迫金」名義，嚟完成國家任務，恐怕嗰刻大家只能含笑供款。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://s.nextmedia.com
