大師冇點你│7月唔去日本 係咪唔理性？（李聲揚）
大師冇點你│7月唔去日本 係咪唔理性？（李聲揚）
取消去日本，係咪「唔理性」？聽到銀行擠提，去排埋一份
，又係咪「唔理性」？而家人人唔去日本，我見到機票超易訂，酒店又勁平。係咪應該別人恐懼時我貪婪？我都有咁嘅打算。
美股外幣即時報價 多國新聞任睇
地震的確好難預測 但又有一定周期
香港航空玩到取消咗熊本同鹿兒島嘅機，既係預咗，又係意料之外。意料之外係講最初初，日本地震嘅傳言唔知邊度走出嚟，忽然漫畫書就變咗大預言。加上真正專家又講，未來幾十年，好大機會。於是越講越多人信，去到一個臨界點。
到底會唔會地震？冇人知。地震的確好難預測，但又有一定周期，講到未來三十年震舖勁嘅機會，八成以上。問題係，三十年入面開邊日？冇人知。事實上亦唔係今年先有呢個「三十年內八成機會」嘅講法，往年都係咁講。但舊年去你就唔覺，今年加埋七月傳言，你就好覺。
原本我以為香港人咁愛去日本，冇人會care，之前都傳過好多次，甚至真係地震埋，啲人都係照去。2011年嗰次夠勁啦，結果事隔兩三年又照去。
事實上，今年七月撞正大地震嘅機會，應該好細。問題係，好多人寧可信其有。當中嘅心態，係人性，亦同投資有啲關係。風險，從來都係好難量度。即使有歷史數據，你都總覺得自己未必咁好彩，或者未必咁好彩。六合彩好難中，但你次次都覺得自己會中。相反，細個O Camp玩「辣辣壽司」，明明每個人中招嘅機會係極低，—但到你中嗰時，又係中到應。
陸陸續續聽到有人真係話唔去日本，咁所以航班都取消埋，就唔令人意外。連日本當局都十分頭痕，之前又嫌遊客多，而家又怕冇遊客，甚至要嚟澄清七月地震講法係冇根據——但官方可唔可以保證唔會？又唔可以喎。
有趣地，我發現好多取消去日本嘅人——其實自己根本都唔信。問題係，去遲一個月好閒，但七月去，就可能畀阿媽煩你。費事煩，就遲兩個月先去吧，代價好細——問題係，遲兩個月去，風險會唔會低咗？明顯唔關事。
今我諗起銀行擠提。銀行擠提係十分有趣嘅社會現象，因為以往真係經常「自我實現」：原本銀行冇事，但有人以為有事，個個都傳有事，個個都去拎錢，結果就冇事都變有事。因為銀行從來都唔可以畀咁多人同時拎錢。
問題係：如果你聽到你開戶口間銀行傳有問題，人人去排隊拎錢，你去唔去排？
十幾廿年前，某銀行就傳過一次。結果真係好多人走去排。雖然金管局講明冇問題，銀行自己都話冇問題，最後都冇問題，甚至唔知個傳言邊度起。但，人人都係攞咗先算。
但去排嘅人，係咪「唔理性」？佢係咪真係覺得銀行會執？未必。
明明好多人，都心知間銀行應該冇事。但，「都係小心啲好」，呢個心態同因為怕七月地震唔去日本，有啲相似。
請諗下個 2 X 2嘅表：如果銀行真係冇事，你去咗拎錢，有乜損失？都冇乜，只係可能花啲時間排隊，代價好細。如果銀行冇事，你冇去拎錢，又如何？頂多可以上網笑啲人無嘢搵嚟驚——但如果銀行真係有事，你拎咗錢，你就係天才。如果銀行有事，而你冇去拎，你就後悔莫及。
大約就係一個咁嘅博奕，因為拎錢嘅成本太低，銀行又唔會收你手續費，又唔會你拎走咗之後唔畀你開返，所以聽到有問題，人人都係提咗錢先算。
至於唔去日本，代價可能大少少，但相信啲人只係七月唔去，頂多今年暑假唔去。下年又一條好漢啦，係咪？
以上呢啲東西，其實同投資都好有關係。好多人唔去投資，就係因為驚股災。股災會唔會出現？成日都出現，幾年就一次。但可以點避？近乎冇得避。於要好多人，就選擇唔買，唔買咪唔會輸。結果冇股災，人哋賺錢，就可以話人哋只係好彩。
問題係，唔同嘅遊戲，背後嘅風險回報，真係完全唔同。冇錯，股災係成日見。但驚股災嘅人，忽視咗幾樣嘢：第一，牛市差不多必然長過熊市一大截。第二，計環球市場，普遍股市長線都係升多過跌。第三：唔投資，其實一樣每年輸緊錢，有樣嘢叫通脹，只係你唔覺唔覺啫。
李聲揚
前大行分析員，如今無業遊民，別人恐懼時我貪婪
FB Page︰meatbonetea金融肉骨茶
本欄逢周一刊出
大師冇點你 - 李聲揚 舊文
本文作轉載及備份之用 來源 source: http://hk.finance.yahoo.com
