笑到最後｜自動駕駛的破壞性創造（高明）
笑到最後｜自動駕駛的破壞性創造（高明）
Tesla（TSLA）宣佈6月22日喺Austin正式推出RoboTaxi服務，馬斯克話「街道將會好
快改變，兩至三年內全世界都會有好多自動駕駛汽車」。但大部份人對RoboTaxi嘅理解仍然停留喺「取代的士」呢個層面，其實未必，科技發展往往超出發明者嘅預計，就好似當年覺得AI晶片只係用嚟打機，原來透過AI亦都可以將黃仁勳變成唱AiScReam嘅主角。
美股外幣即時報價 多國新聞任睇
RoboTaxi價錢跌到夠平 Tesla將發大財！？
Tesla今次推出嘅RoboTaxi用緊出廠無改裝嘅Model Y，即係話每架Tesla都有非監控自動駕駛unsupervised self-driving能力，呢個設計思路同Waymo嘅專用車隊完全唔同，暗示緊一個更廣闊嘅應用前景。
ARK Invest（ARKK）預測自動駕駛叫車服務到2029年可以為Tesla帶來9510億美元收入，佔其總收益90%。但呢個數字背後隱藏嘅係，如果RoboTaxi價錢跌到夠平，可能會出現意想不到嘅應用。
Waymo而家每週完成超過25萬次付費乘車，主要喺三藩市、洛杉磯、鳳凰城同Austin運營。但Waymo嘅商業模式依賴專用車隊，成本高企限制咗佢擴展嘅靈活性。Tesla嘅做法唔同，每個Tesla車主都可以將自己架車變成RoboTaxi出租，呢種分散式營運模式可能會創造全新嘅交通生態。
如果大量人購買Tesla用嚟做RoboTaxi出租，市場上嘅供應量可能會急速增加，車費就會相應下跌。當RoboTaxi車費跌到足夠平，可能會開始搶巴士嘅生意。想像下，如果RoboTaxi車費同巴士票價差唔多，但可以點對點直達，唔使等車轉車，邊個仲會搭巴士？
現時Tesla嘅FSD系統用8個鏡頭作為「眼」，相比Waymo嘅激光雷達、高清地圖組合，成本低好多但靈活性高好多。呢種技術路線如果成功，意味著RoboTaxi可以去到任何地方，唔會受限於預先繪製嘅地圖。
自動駕駛可能會變成部份人嘅「移動城堡」。例如去旅行嘅時候租架RoboTaxi，夜晚瞓覺時設定目的地，第二朝起身已經到達另一個城市，咁樣既慳返酒店錢，又省咗交通時間。當然到時嚿電要有足夠續航力，或者識得自動去充電而唔影響乘客。
呢種應用場景特別適合長途旅行或者商務出行。傳統模式要坐飛機或火車、訂酒店、搭的士去機場，但如果有RoboTaxi，中短程可以直接瞓住去目的地，一條龍解決曬交通同住宿問題，disrupt埋酒店需求。
Tesla嘅approach係將自動駕駛功能整合到每架車入面，而唔係另外建立專用車隊。呢種策略嘅好處係可以快速擴展，因為每個Tesla車主都可以成為服務提供者。
更重要嘅係，Tesla自動駕駛業務其中一個賺錢元素係授權其他車廠。未來自動駕駛會變成汽車嘅基本配置，就好似而家嘅安全氣囊同ABS咁，冇呢啲功能嘅車根本賣唔出。到時各大車廠做唔掂自動駕駛技術，一係搵Waymo，一係搵Tesla，情況會好似而家嘅手機作業系統咁，iOS同Android瓜分曬成個市場。
Tesla嘅優勢係佢哋嘅FSD系統可以裝喺任何車款度，唔似Waymo需要專門嘅硬件配置。如果Tesla成功建立咗呢個授權生態系統，每年單係授權費就足以支撐公司大部份收入，呢個先至係最終嘅商業模式。
Uber（UBER）已經開始同唔同嘅自動駕駛公司合作，包括Waymo同中國嘅WeRide，採用分銷商而唔係製造商嘅角色。Uber嘅策略證明咗RoboTaxi市場嘅多元化發展，唔會係一間公司獨大，長遠Call車必然要跌價，因為人又揸Call車，自動駕駛又揸Call車。
以前返工要泊架車喺林士街或中環中心，泊成兩三嚿水一日，已經諗點解要第一浪費架車唔鬱，第二要倒貼停車場錢。科技發展原來人人都可以係蝙蝠俠，㩒個掣架車返嚟搵你，如果法例放寬，你返工，駕車又返工，放工又有車接返走，你話幾好？
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
