異動空間：盈大再挑戰新高 - 魏力
■李智康任副主席的盈大地產，昨突破2月以來橫行區，逆市漲11%，有力衝穿2月高位6.9元。資料圖片
港股生人勿近，大戶托住指數散貨，睇盤路，科網股暫時勿沾手，基金出貨的模式是：開市先大力質一浸，然後輕輕買返上去，等散戶以為見底，然後再一路向下派到收市。如趁即市反彈追貨，就正中基金下懷。
為維持一定持倉，沽完新經濟股，大戶唯有係咁意掃番啲內銀、內險、內房，順道挾淡倉，炒一轉又再沽。早幾日魏力8蚊叫買綠城(3900)，三日挾上9.8元，如果冇走貨，昨已碌返落9蚊，利潤唔見近半。炒細價股呢？中國家居(692)單日狂瀉42%；中國創新支付(8083)又插13%；第一視頻(082)再碌一成，明顯莊家都進入清倉階段，此一時、彼一時，切勿勇字行頭，扮清兵衝入場，以為執到平嘢，莊家股一旦「熄燈」，跌八九成都唔出奇。
揸到一手蟹貨的話點算好？咁要睇嚇係概念股定係有業績支持。股民恐慌時唔理三七廿一，好股衰股一齊掟，齋炒概念股份一般較難反彈，要極速斬纜；相反，績優股可以趁低撈，撈邊隻，幾時撈，請留意fb update。盈大地產(432)趁淡市炒上，昨突破2月以來橫行區，逆市漲11%，收報6.63元，成交配合急增，有資格衝穿2月高位6.9元。
魏力
http://www.facebook.com/2012jason
上一則: 何車500：特殊情況特殊價 - 何車
下一則: 青心直說：中信的如意算盤 - 胡孟青
異動空間 - 魏力 舊文
