魚樂無窮：三凶兆乍現不得不防 - 唐牛
■恒指昨日埋單跌132點，大市更乍現三大凶兆。資料圖片
恒指昨日埋單跌132點，唔算重災，但係魚缸戰友好多都年初四咁嘅樣，無他，好多炒股都跌到一仆一碌，大市更乍現三大凶兆。
第一，龍頭股散水。舊年三大藍籌狀元︰騰訊(700)、銀娛(027)、金沙(1928)，前兩者已經由高位插水兩成，傳統上已定性步入熊市，舊經濟股始終未全線復蘇，大市群龍無首，有危機！
第二，炒股無厘頭大跌。十大跌幅榜中，不乏熟口熟面細價股，包括中國家居(692)、21控股(1003)、鵬程亞洲(936)等，其中中國家居急插四成，成交億億聲，唔排除係孖展斬倉盤，弱市下隨時做成骨牌效應，慎防洗倉活動越演越烈。
第三，企業抽水活動頻頻。先有新鴻基地產(016)發紅利認股證及新世界(017)供股，再有和黃(013)減持屈臣氏股權，新近再嚟招商局(144)變相供股，再加上金山軟件(3888)發換股債，以上種種無不顯示公司們搵水心切。
老老實實，佢哋對環球經濟最新情況清楚過你同我，睇淡後市之心可想而知。
舊經濟股向惠理埋手
金手指揸旗嘅惠理集團(806)，弱市下仍有好表現，皆因公司揀股有一手，尤以中資股為甚。
惠理集團噚日收報5元，升1.4%，10日、20日及250日線幾乎重疊，相信好快有突破，如果戰友唔知向邊隻舊經濟股埋手，惠理會係一個好選擇。
唐牛
上一則: 炒友Blog：天津港炒京津冀概念 - 邱古奇
下一則: 股場放大鏡：資金避險候低買旺旺 - 歐陽風
魚樂無窮 - 唐牛 舊文
