名嘴轉軚
2014/4/8 上午 09:50:39
網誌分類: 經濟
美股連跌三日，跌勢愈跌愈急勁，開始跌到人驚啦。大市此前下跌，由科網股、科技生物股及小型股帶動，藍籌股仲企得穩，但昨日科技股再跌，連藍籌股都頂唔順，三大指數均跌超過1%。杜指連續兩日跌超過100點，昨日跌167點至16246點，標普500指數挫20點，收報1845點，離關鍵支持位1840點只有5點之遙；納指跌48點至4080點。
要搵下跌理由，可以話有幾個。第一係科技股繼續領跌。昨日開市時標普500指數期貨下跌了0.3%，但納指期貨已跌了0.7%，跌了整天跌幅的60%，可見納指之弱。
第二，數據唔足夠支持升得太顛。美國昨日只有2月消費信貸報告出爐，只屬一般。科技股炒作其實都建基於經濟前景好之上，但經濟只屬普通。分析員指出，上周公布的3月非農就業增長人數19.2萬人，與市場預期唔差得好遠，但呢個增長數字，遠遠未能說服投資者美國經濟此前兩個月的疲弱表現，純係因為天氣嚴寒所致，加深了投資者對美國經濟復甦的步伐未必夠快。由股票恐懼指標VIX指數跳升12%至15.57的三月中高位，反映市場正憂心忡忡。標普500指數而家在15至16倍預期市盈率之間，但科技股好多炒到30倍以上，唔係好強的經濟，支持唔到咁高的市盈率。
睇睇自3月起計之前急升的科技股跌咗幾多:Pandora 跌29%，Zynga 跌28%，
Netflix 跌24%，Facebook 跌21%，Amazon 跌15%，所以你話騰訊自高位跌18%有幾出奇。
第三，經濟前景可能無預期咁出眾，投資者又睇番聯儲局放水條數。但現在聯儲局正在逐步縮減QE，市場預期聯儲局於月底再削減每月100億美元買債規模至只有450億美元。昨日，聖路易斯聯儲行長布拉德(James Bullard)表示，預計今年美國經濟將增長約3%，聯儲在調整縮減QE幅度的問題上應保持謹慎，上周發布的3月非農就業報告沒有改變他對縮減QE步伐的看法。
Babson Capital的Clifford Noreen表示，被人為扭曲了頗長一段時間的市場利率，正走向正常，聯儲局削減買債的行動係對經濟有益的做法。不過，聯儲局貨幣寬鬆措施，係推動大市的主因之一，特別係那些盈利低但增長預期高的熱炒股票。聯儲局放水，這些股票升得癲，聯儲局收水，跌得特別勁，都係意料中事啦。
美股急回，嚇怕投資者，最趣係著名財經主持Dennis Gartman之前一直睇好，昨日突然轉軚，話自己俾上周五的市況嚇怕了，認為出現一個「期待已久、十分需要的調整」他要出逃股市，把資金放在現金戶口和黃金上。佢認為股市仍在牛市，在牛市可以有三種部署，真正睇好，溫和睇好和中性。如今是採取中性態度的時候，由於尚在牛市，不用沽空，但也不用買股票。
雖然我們會笑名嘴Dennis Gartman轉軚轉得太快，但美股似乎真有一個似樣少少的調整到來，雖然港股好似企硬唔係幾想跌，但呢啲時勢都係睇定啲好少少。
陸羽仁
回應(5) 我想回應
陸羽仁 BLOG 舊文
