中環在線：
迪士尼前大公關出山幫領匯拆彈
■盧炳松今次加入領匯，希望可以令公司唔好成日俾人鬧。
領匯(823)公關阿頭上周三換人了。喺公關界具有江湖地位嘅盧炳松(BC)今年初先至離開香港迪士尼，話夠60歲退休去了，點知半年未夠，佢就忍唔住要重出江湖，啱啱喺本月4號去領匯返工，接替已經轉做顧問、計劃明年退休嘅潘啟迪(KT)。
指上市公司形象唔鮮明
BC話，原本打算退休後，跟家人成立一個幫助長者同兒童嘅慈善機構，亦籌備得如火如荼，點知上月接到獵頭公司邀請，問佢有冇興趣去領匯。佢覺得領匯面對緊嘅問題，同佢當年加入迪士尼做大公關負責拆彈差不多，覺得呢份工富挑戰性，於是好快就決定加盟。
從公關角度，佢認為，領匯最大嘅問題係做咗好嘢冇人知，而且上市公司嘅形象唔夠鮮明。佢舉例，領匯不時俾人鬧狂加租、趕走小商戶，實情係，領匯已經係一間上市公司，以股東利益為先其實冇問題，只不過大眾仍然以為領匯係政府擁有，當中存在「誤會區域」，有待澄清。
潘啟迪轉做顧問明年退休
BC返工唔夠一星期，已經對領匯嘅公關問題瞭如指掌，咪就係因為佢經驗豐富囉。佢曾經喺可口可樂工作15年，直至2006年農曆新年期間，香港迪士尼樂園發生內地客逼爆落閘事件後，形象插水，搵佢過去做大公關負責拆彈，8年過後成功改善樂園形象。佢希望，佢喺迪士尼嘅經驗可以幫到領匯，但知道唔易做。
呢份工當然唔易做喇，否則都唔使先後搵KT同佢兩名公關界名人坐鎮。KT年紀大過BC些少，2010年初由醫管局過檔領匯，準備退休，現時轉做顧問，明年初先拜拜。
李華華
mailto:LiWaWa@AppleDaily.com
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp
LiWaWa@AppleDaily.com
中環在線 - 李華華 舊文
