智取大市：信証食正當炒概念
■王東明任主席的中信証券食正滬港通、A股入摩指等當炒概念，股價有望爆升。資料圖片
每次喺上落市頂部，股市重估嘅故事往往寫到似模似樣，今次就係講到經濟回穩，仲有阿爺「定向降準」等等新招，令大家有番些少希望。究竟新招得唔得呢？
所謂「定向降準」，簡單啲講，係話貸款比例符合某種要求嘅銀行，先有得降準，有鼓勵性質。人行應該係行啱步棋，理想化嘅話，長遠可以引導資金去到「三農」、小微企業呢類需要扶持嘅部份，令銀行貸款結構更為健康同時，又可以刺激經濟。如意算盤打就係咁打，但係內地最大問題，就係樓市，如果唔掂，就蓋過好多利好因素。
內地樓市未見起色，如果喺嚟緊7、8月旺季不旺，房企隨時要再劈價套現，拖低樓市，然後建築量下跌，影響各行各業，想翻身都唔易，經濟數據隨時又失蹄。同時內銀嘅貸款質素大家有眼見，投向內地房地產比例大，如果樓市頂唔住，內銀唔撇賬都唔得。所以話，而家個市升有故仔，呃到你入市，如果股市轉升為跌，其實一樣有故仔。
除非長線圖表見到有轉強跡象，否則晉佳唔會輕易相信升市重臨。睇番周線圖，MACD喺上月中已經出現買入訊號。歐債過後，三次周線圖MACD出現買入訊號，都會有升浪出現，雖然最近係第四次，但今次MACD波幅收得太窄，影響咗買入訊號準繩度，似係長線上落市末段居多，所以長線入市訊號應該要再觀察嚇先定奪。
短線又點？呢個欄見報時MSCI新興市場指數納入A股嘅諮詢結果已經公佈，隨時挾多一嚇，到時距離23500僅一步之遙。事實上，上周期指淡友曾經發力，周五下午急插嗰嚇真係好似升浪玩完，點知今周人民幣、港滙強勢之下，即刻翻生，睇嚟阿爺都係幹預人仔順便幹預埋個市。
入定券商股等起舞
呢一刻，好友佔上風但又未算好強，晉佳未相信淡友會呢個時間棄械投降，但老土啲講句，短線都要有兩手準備。如果淡友反撲，反彈浪「狼來了」可能真係出現，隨時有起碼千點跌幅。如果淡友逼住平淡倉，就挾到上24000樓上都絕不出奇，炒風亦肯定會重燃，到時短線點都搭嚇順風車。
呢一刻要揀股，券商股都係值得考慮嘅板塊，始終滬港通、MSCI納入A股、A股IPO重啟，樣樣券商都有著數，如果有升浪，買券商股博呢浸一定冇死錯人。中信証券(6030)、海通證券(6837)圖表都唔差，前者最近一個月沿住保歷加通道中軸企穩，噚日算係第一棍，成交亦增加，走勢認真唔錯，首站有條件上番19元，跌破保歷加通道中軸16.43元止蝕。
晉佳
本欄逢周三刊登
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp
晉佳
智取大市 - 晉佳 舊文
