表錯情
2014年11月19日
滬港通啟動第二日，股市繼續喺好消息落實下出貨，唔單止香港股市腳軟，連北上的滬股通限額都開始積滯。
喺未開通前，大家對滬港通只係憑想像猜想有乜影響，到依家真係落實，就發覺原來有啲地方表錯情，其中一樣係中國股民南下，可能係想買吓大價好似匯控(005) 或濠賭股，不過，從首日南下港股通的數量，發覺大家對買港股興趣只係一般，尤其對大股胃口好麻麻。
滬港通洩咗氣，港股昨再插267點收市，收報23529點；國指收報10426點，挫128點，成交金額746億元。港交所(388) 續跌2.36%；利豐(494) 挫3.8%，是表現最差藍籌。AH折讓股再被掟，擬斥15億元設基金的經緯紡機(350) 昨復牌急跌24%，真係好鬼傷！
中國股民炒細唔炒大
中國股民有興趣的是炒股，佢哋係中國猛炒冷門股，到香港落注興趣都無變。佢哋炒股方法係圍內左手交右手，小基金炒完拋畀大基金炒，手法同本地莊家炒兩炒散水畀散戶接貨唔同。呢排好多股仔炒上，升幅睇到旁觀者目瞪口呆，得個恨字。
好似日前話易手的新傳媒(708) ，昨日再癲升近倍，幾日間累積升7至8倍，市盈率去到200倍樓上，從常理根本解釋唔到，只能夠講市場需求大過供應，咁股價咪繼續升囉。
新傳媒咁樣癲升，令人諗起幾年前國際德祥夾輪事件。當年國際德祥送窩輪，一掛牌就喪炒，認股證炒到貴過正股，好多塘邊鶴同出市仔覺得唔合理，唔信邪紛紛篤手指沽空，結果呢隻輪夾到天咁高後停牌，沽空者面臨無貨交收。
中國股民鍾意短炒多過長揸，以為大股有運行變咗表錯情。曾經有人估會唔會因為滬港通受惠嘅匯控仲加黑仔。佢被比利時檢察部門起訴，旗下一家瑞士私人銀行，涉嫌協助過千名客戶逃稅及洗黑錢，導致比利時損失數以億計歐羅，匯控表示會全面合作，並透露法國亦作相關調查。
匯控被查一波接一波
匯控股價昨收報77.2元，跌咗0.35元，雖然同其他股比唔算跌得多，但佢先前無乜點升過，一插就已經入咗肉！
被指通過匯控旗下銀行逃稅及洗黑錢的，包括比利時北部安特衛普的鑽石商。檢察部門指逾千名富裕客戶自2003年起，通過匯控旗下一家瑞士私人銀行，將大筆金錢由瑞士銀行的戶口轉移到避稅天堂巴拿馬及英屬處女島，估計有數十億歐羅資金流走，令比利時當局損失數以億計的稅收。當局正式起訴這家瑞士私人銀行財務欺詐、洗黑錢及有組織犯罪，匯控則被指作為金融中介機構從事非法行為。
陸羽仁
金融High Tea 舊文
