A股「入摩」 市場打定輸數
2015年06月10日
港股繼續捱沽，跌穿27000點關，主要是投資者擔憂下周美國議息，有可能會加息，再加上內地通脹及工業品出廠價持續疲弱，投資者對經濟不無顧慮。今日MSCI會公佈檢討結果，市場對納入A股已打定輸數，所以就算最終食白果，對股市影響不大
。反而，若MSCI仿效富時指數為A股設一個過渡指數安排，隨時有意想不到的刺激作用。
上次富時宣佈推出A股過渡指數安排時，專登在新聞稿尾加插一段中證監主席肖鋼回應，話「支持富時這項舉措和鼓勵所有國際指數公司開展將中國A股納入全球基準的過渡計劃。」既然肖鋼開到聲，又有富時做先鋒，MSCI蕭規曹隨跟富時搞過渡指數，係咪無得諗呢？況且，中國市場咁有潛力，肖鋼開到聲，你識做時，我都識做，投桃報李乃係中國人美德，咁就睇吓MSCI點樣打算盤了！所以如果MSCI照辦煮碗搞過渡安排，投資者都未必會感到太意外。當然，若揸正嚟做，一於不開先例，對市況(尤其港股)影響都不大，因為港股近日已持續跟中國股市背馳，已一定程度上為A股不納入MSCI做好準備。
匯豐控股(005) 策略日，焦點放在訂定多項選總部準則，及未來業務發展大方向。匯控明言把業務重點放在珠三角，相信市場會頗受落，始終中國經濟雖然放緩，但放眼全球，仍然是十分可觀的增長。現時來說，遷冊難有最終結果，要年底才有決定，但匯控已攤牌在研究，若一旦他遷，可能會引發其他國際銀行效法，所以英國方面要小心處理，如果在稅務或監管上有更大彈性及更多回應銀行訴求，或者匯控最終都會選擇留低，畢竟遷總部涉及大量工作及開支。
匯控港員工 憂吃無情雞
匯控遷總部要年底才有結論，但炒魷魚就即時展開，而且今次炒人數目龐大，高達2.5萬人，若計及有意出售的巴西及土耳其業務涉及削減的人手，受影響人數高達5萬名，出手十分「豪」。雖然匯控暫時表示香港無裁員計劃，但對上一次大裁員，本來都是說香港無炒人計劃，但裁員執行期間，發覺香港的成本收入比率改善欠理想，成本增長快過收入增長，結果香港都要加入炒人行列，分3年裁減3000人。因此，今次匯控打出裁員節流牌，就連香港員工都會憂心忡忡。大企業每次要提升業績，減省成本，往往向員工開刀，又難怪不少人認為，現今的僱傭關係，已大不如前了！
《星島日報》財經組總採訪主任 auchoyee@gmail.com
歐祖貽
投資Cafe - 歐祖貽 舊文
