金融High Tea 2015年6月10日
黑天鵝憂慮 震散紅色股
2015年06月10日
美股繼續消化9月份可能會加息，杜指再向下調整，幅度就唔算好大，但港股昨日低開後就腳軟，指數持續向下，股民最痛係紅色股出現小股災，好多內資炒作的二、三線股滑落，跌十個、八個巴仙已經算係小事。有人形容呢次係紅色股嘅黑天鵝演習。
疑觸發政改前減倉
剛公佈的CPI通脹數據差過預期，PPI生產物價指數又連續39個月錄得按年跌幅，加上投資者擔心美國或會提早加息，在負面消息籠罩下，港股反覆下挫，恒生指數全日瀉326點，失守兩萬七大關，國企指數跑輸恒指，收市瀉1.8%。
除咗指數唔靚仔外，近日無理大市上落自己炒自己的二、三線股，幾乎全面滑落，其中一個解釋係內地炒股網「格隆匯」提到港股可能「黑天鵝」事件，呼籲投資者做好兩手準備，相關說法出籠後，紅色股無論係正路大股同莊家股都掉頭回落，之前經常掃貨的經紀牌只見沽貨。
「格隆匯」那篇文章講真冇乜驚人之見，只是提到香港下星期政改表決，認為如果方案通過，咁就萬事大吉，利好政策應會上馬，若然方案否決，「港股跳空低開基本鐵板釘釘的事」，文章仲話，由於港股沒有升跌限制，故此政改表決後即市會相當波動。
本來，文章係叫人做好兩手準備，即係教人沽吓期指做對沖之類，但佢講到複複雜雜，相信好多內地大媽都未必明，咁好多人就會學好第二個建議，就係控制一下倉位，可能係咁樣，搞到好多紅色大股同紅色炒股都丟了下來。
政改方案下星期表決，恒基(012) 李四叔話若然通過恒指會上三萬點，呢點係咪真係咁無謂拗，反而話如果政改方案唔通過，中央利港政策係咪會收緊，就值得商榷，尤其係各項金融制度，因為阿爺係好想政改通過，但金融改革係國家大政，點都會照行，同政改方案無乜關係，正如好似基金互認，已經訂好下個月實施，根本無諗政改通唔通過呢個問題。
「壞消息」提早消化
對於政改會唔會爆「黑天鵝」事件，有包拗頸的中環茶友話，黑天鵝事件的定義係違反常理、不能預見之事。而家政改方案表決，日期一早知道，而且連政務司司長林鄭月娥都唱淡通過機會渺茫，照計通過先係意外，唔通過係正路喎，咁仲算唔算係黑天鵝事件先？如果政改被否決係預先可以估計的結果之一，咁會唔會又變番壞消息係入貨時機呢？照咁講，未來呢幾日如果個市再跌，咁就有可能見到今個月低位呢？
由於紅色股無運行，個市幾乎由頭沽到尾，質低港股最多跌345點，最終挨近低位26971收市，收造26989，挫326點；國企指數收報13861，挫252點%，成交增至1669億元。
藍籌股大致受壓，紅色股受壓最明顯係掛牌翌日遭投資者獲利的中車(1766) ，全日急跌12.5%，收13.72元；旗下南車時代(3898) 亦捱沽，瀉5%，其他高鐵概念股都遭拋售，基建鐵路股係內地錢最鍾意炒賣的板塊，由佢急跌反映沽貨都係內地錢，其他好多二線股都軟晒，幾隻熱炒股都跌超過兩成，而且成交唔少，炒得港A股，就真係要預咗咁，預先啪定驚風散同暈浪丸。
收市後匯控(005) 提出十項策略行動，包括裁員同賣資產，目標在2017年之前，實現10%以上的股東權益回報率，不過對於搬返香港做總部，集團仲係模棱兩可。本來市場對匯控策略日期望唔係咁高，加上歐洲個市仲係消化緊息口向下的可能性，十項策略公佈後，倫敦股價反覆下滑，最新造6.15英鎊，折合72.97港元，比本港收市價73.25元，跌了0.38%。
陸羽仁
金融High Tea 舊文
