魚樂無窮：天彩無蟹貨展翅高飛
■天彩7月2日於主板掛牌。圖為集團主席鄧榮芳。 資料圖片
噚日推介雲南水務（6839），一度重上招股價，但與惠理增持價依然有距離，憧憬未完。雲南水務5月底掛牌，叫做享受過一個月蜜月期，可憐今個月出世嘅新股，甫上市即遇上股市十號風球，遍體鱗傷是常識吧！不過
，同一件事可以用兩個角度睇，7月固然難捱，但卻是新股試金石，能夠極速收復失地嘅，非池中物也！今日推介嘅天彩（3882），正正係狀元級數。
天彩7月2日於主板掛牌，可謂生不逢時，股價跟隨大市拾級而下，7月8日一度低見1.6元，較招股價3.38元低足足53%，名符其實冇咗半條人命。正當眾人心死之際，奇跡出現了，港股連升幾日，天彩亦由谷底反彈，噚日更喪升15%，重上招股價兼創收市新高！
天彩可以絕地反擊，當然係真材實料。根據專業報告，天彩乃全球運動相機生產商二哥，主要收入來自GoPro及其供應商，去年總計達82.7%，天彩有如此大碼頭，業績梗係唔會失禮。去年全年賺2億銀，現價市盈率14倍，美國上市嘅GoPro，最新市盈率65倍，天彩足足平78%。日前更發盈喜，預計中期收入及盈利按年將升逾八成，保守估計全年keep到增長，市盈率將降至單位數。事實上，天彩即將推出自家品牌家庭影音及可穿戴產品，亦有利估值提升。而家步入無蟹貨區，好快展翅高飛了。
唐牛
https://www.facebook.com/tongcow88
唐牛
魚樂無窮 - 唐牛 舊文
