異動空間：王道掃貨三技巧
講完目標價及止蝕價概念，呢篇進階一點講嚇買貨技巧。短線炒賣格格都係錢，每日買平幾格又走高幾格，長期回報可差一大截。當各位發掘咗隻心水股，落盤掃貨前，有幾樣嘢要準備及注意：
1）裝番個串流報價機。幾百蚊個月好貴喎！係肉赤啲，但卻幫你做少好多儍事，因為報價機有得
睇盤，邊間行掃得凶狠？直掃多定直沽多？每口成交有幾大？買賣盤實力如何？一目了然。這是不停refresh免費報價都畀唔到你的資訊，幫你更快睇清全局，做決定都快好多！
2）九點前起身。雖然九點半先開市，但想快人一步掃貨，九點至搭三的競價時段卻不容錯過。不少莊家鍾意頂高個價沽一浸再掃番上去，如早排推介世界集團（713），高開幾格倒跌再掃高15%收市，識得等沽壓少啲先入場，隨時買平十格八格。假如隻股好啱心水，亦可即刻落競價盤買入，唔使開市搶到氣咳。
3）搜尋相關新聞，再到聯交所望通告。股票高開，通常係受消息刺激，想買邊隻股，於競價時段上網搵嚇有乜消息，評估對股價的影響，對掌握買入時機亦有幫助。
魏力
http://www.facebook.com/2012jason
魏力
異動空間 - 魏力 舊文
