預咗加息 投資醒定
2015年07月15日
希臘債務有咗解決方案，基本上以德國為首的歐羅區成員使出辣招，要希臘賣家當兼勒緊褲頭，希臘總理齊普拉斯玩嘢，希望以民意迫使歐盟債主削債，結果被債權人一招閂水喉玩殘。希債危機暫時平息，有分析認為會令美國加息機會增加，同時影響全球資金走向。
另外伊朗和西方達成協議，將解除禁運輸出石油，預計油價又有壓力向下，油價跌對美國、中國經濟都有利。
美股下行 外圍受壓
同政經猛人傾起，希債危機平靜後，歐羅區相信短期無乜壞消息，若然歐羅強番啲，美國就有條件加息。以美國經濟狀況，承受加息能力唔會係好強，估計今年有可能加一至兩次息，跟住就要觀望一吓效果如何。聯儲局主席耶倫早前露了口風，似為加息鋪路。
BCT銀聯集團投資總監夏卓華就覺得，希臘至今年底仍有約1000億歐羅需要償還，因債務問題仍需談判，歐羅區金融市場存隱憂，歐洲央行將維持量寬政策，不利歐羅走向，區內出口及企業盈利應可受惠歐羅貶值，他還預期，美國下半年將加息1至2次，每次0.25厘。
耶倫喺利息問題上，作風偏向鴿派，佢唔似會大力加息，喺呢個前提下，早加息反而好過遲加息，因為早加可以避免遲啲加得更多，所以依家就要睇呢位鴿派係咪真係「的起心肝」調高息口啦。
美國利息超低，而且維持相當長時間，若然息口上調，就算幅度唔多，都可能影響全球資金流向，引起震盪。美股有少少一級級向下的感覺，杜指5月高位18351點，6月高位18188點，依家又近高位在18000點左右，有少少一浪低於一浪，很可能正承受利息向上的壓力。大陸本來準備逐步放水，應對美國抽高利率，點知發生7月的A股風暴，唔多唔少打亂部署，所以投資者未來都要增加留意美息有無異動，取態不宜太進取。
內地喺接連救市後，波幅開始收窄，上證綜指一度升上4000點，高見4035點，但金融股板塊拖累大市，4000點關得而復失，打破上證三連升的反彈升勢。上證指數全日收報3924點，跌45點，成交金額8301億元人民幣；深成指數全日收報12728點，升114點，成交4920億元人民幣。
內地回吐令港股特別係國企股跟跌，午後曾跌逾三百點，後來有啲反彈，恒生指數收造25120點，跌103點；國企指數收報11836點，跌167點，成交再縮至1261億元。內地升咗咁多日，回吐一下好正常，而且除了上證綜指略跌1.1%之外，深成指收和創業板指數都升，內地創業板指數昨日最多升5.4%，收升仍升1.6%，成日守住1%左右升幅。唔好忘記內地昨日又有百幾隻股份復牌，仲搞得平平穩穩，局面俾阿爺控制往啦。呢個星期五內地期指結算，估計內地股市即使回吐都唔會回太多，阿爺唔會放生啲淡倉。
東航有迪士尼概念
呢排做了A股好友的高盛發表研究報告指，牛市中出現大幅調整是很常見，經過過去三周大跌，調整已經大致完成，是良好的買入機會，建議投資者買入四類股票：融資盤較小、槓桿不確定性較低的優質股票；現金充裕估值不高，且正在回購的股票；評級列為買入，基本面強勁又超賣的H股及中資股；以及部份港股中小型股。雖然美資大行唱好，但散戶要自己衡量風險。
上海迪士尼度假區將於今日舉行網絡發佈會，將披露包括上海迪士尼樂園、兩座主題酒店以及迪士尼小鎮設計細節。國泰君安預計，上海迪士尼會在2016年春季正式開園，會先在2015年年底做試營運，根據香港經驗，先試運營幾個月之後作正式開園。上海迪士尼開幕，概念上對東航(670) 有利，由於油價持續低迷，東航上半年業績應該對辦，呢隻股不妨列入觀察名單，遇着跌市可趁回落博反彈。
陸羽仁
金融High Tea 舊文
