中環在線：
趙世曾重金聘林志玲
花逾百萬 為深圳新盤宣傳
■樓盤廣告上林志玲性感打扮，應該無令粉絲失望。
卓能集團（131）內地樓盤深圳龍華OPUS本周開售，請咗41歲嘅台灣名模林志玲宣傳，先係報紙廣告，又搵佢本周五去深圳為樓盤做特別嘉賓，一向多靚女埋身嘅卓能老闆趙世曾就話，今次花
過百萬元請林志玲，純粹係商業決定喎。
趙世曾話：「今次請志玲為樓盤做宣傳，徵求過深圳嘅代理、廣告公司同網民，結果一致揀咗林志玲，呢個完全係以商業角度去睇，邊個對樓盤宣傳作用係有用啲。其實選咗好多個出嚟，其他人選就唔方便講喇。」
傳卓能斟做代言人
佢位千金趙式芝補充話，林志玲擔任今屆金馬獎頒獎禮主持後，喺內地人氣急升，對深圳市民嚟講，紅過好多內地明星，有新鮮感，仲係男士女神。
為遷就林志玲檔期，公司唔介意先喺本周三發售首批50夥，等到本周五先再舉行多項宣傳活動。趙世曾透露，林志玲周五下晝兩點幾到場，預計逗留兩個零鐘先至走，唔係揮揮手就鬆人。趙世曾估計，到時中港台有大把傳媒到場，肯定幫到宣傳；呢個樓盤有過千個單位，會睇住情況推售。
至於今次係咪重金禮聘林志玲？趙世曾坦言：「非常重金，個十百千萬……（花過百萬元？）有過百萬喇。但我哋（新樓盤）70億元嘅銷售額，宣傳活動使成千萬都濕濕碎喇。」聞說卓能𠵱家傾緊搵林志玲做埋樓盤代言人㖭呀。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
