金手指：
給媽媽的一封信
■筆者指媽媽是他一生中最信他分析的人。 資料圖片
媽，
我仲記得第一次叫你買股票。當年中學，學識乜嘢叫PE ratio，在學校借份報紙睇報價，見到有隻股票特別低PE，憑我一句「我知佢做乜生意」就叫你買。你聽完我講，即打畀經紀去買。我唔知你記唔記得邊隻，呢隻就
係青島啤（168）。買完，隔幾日就開始大升，我當時仲估自己好叻，好多年後睇番，其實純粹符碌撞棍遇到個鬼佬話自己maximum bullish on China。
到1997年大學暑假，你又跟我建議用5.55元買佐丹奴（709），我返美國開學時又冇叫你沽。點知去到1998年，佐丹奴跌穿1蚊。
你之後只提過兩次。第一次係跌穿1蚊時，你簡單問：「你覺得返唔返到家鄉？」當我答會，你就簡單再問：「咁我應唔應該溝一溝？」我當時陰影大，冇叫你溝貨。
你再次提起係1年後，當佐丹奴重返5.55元時，我建議沽貨離場，隻股後尾繼續升，呢次一個鬥零都冇賺，之後有次你在屋企車衫，我坐你隔籬傾偈呻：「好後悔冇叫你溝貨。」你話：「阿仔，唔係你財，唔入你袋呀。」我諗，我從你身上學到je ne regrette rien做人態度。
當年我酗酒，一夜之間冇曬工做。有個晏晝我粒聲唔出，坐在客廳好沮喪，你行埋來捉住我隻手話：「唔係殺人放火，又唔係傷天害理。」此後你從未放棄幫我戒酒。我成世人都激嬲你，大個又成日頂嘴同你鬥氣，你畀我實在太多，應承我大學畢業後有自由，從未反口。你身體力行咁表現乜叫non-aggression principle，不論人點睇，做人一定要繼續做愛做的事。我對數字敏銳，你係我一生中最信我分析的人。
I love you and I miss you.
Your son,
柏文
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
