智取大市：
死都唔估係牛皮市
近排對於港股升定跌、炒乜好，大家似乎完全冇心機討論，戰友們竟然轉為討論收爐定唔收爐好。事實上，12月收唔收爐，其實只係一個藉口，大家唔想玩先係重點，甚至有大行出嚟估恒指出年繼續牛皮，例如摩通之前估恒指出年波幅介乎20500點至23000點。
不過，數據告
訴大家，牛皮市好難長期維持，估升市、估跌市，都唔好估牛皮市。
晉佳今次以恒指過往20年嘅每年高位減低位數字，除以對上一年底嘅收市價，以得出恒指每年波幅。觀乎過往20年裏面，高低位波幅百分比最低嘅年份係2005年，當年恒指高低位波幅都有15.4%，而除咗2005年之外，全部年份嘅指數百分比變幅都高過20%。假設2016年恒指按過往規律運行，出年波幅極大機會超過4000點。
明年波幅隨時有50%
如果再將每個年份逐一拆解，就會發現大牛市或大熊市嘅年份，恒指波幅更直逼50%。以2007年至2009年為例，2007年大牛市年份嘅恒指波幅係66.6%，2008年大熊市波幅係45.9%，至於2009年QE之下港股報復式反彈，全年波幅係81.7%。當然，算式當中嘅分母基數出現很大差異，或扭曲數據，但仍無礙得出分析結論，反映大熊市當中，跌得深，但其後反彈動力更強。
踏入2016年，熊市究竟完未？就當未完，恒指會再沉底，或許會形成大熊市，咁就有機會重複1999年或2009年，出現波幅極大嘅絕地反彈，2016年波幅就有可能去到50%左右。
相反，如果恒指冇進一步下跌嘅動力，相信就會限制恒指波幅於20%至30%之間，都仲有4000點至6000點波幅。最壞情況就係恒指由出年年初一直慢跌到年尾，幾乎全年唔使玩，但如果由現水平跌至少4000點，股市處於極低估值水平，到時就係長線撈貨好機會。最差最差嘅情況之下，即使2016年冇機會，2017年都會有，仲要係一個大翻身嘅機會，因此，晉佳睇唔出投資者要超長線悲觀，股市亦不會長期悶親你。
另一方面，以周線圖觀察，恒指過往五年，最長嘅短線牛皮市，亦只維持大約10周左右，就會出現新方向。目前恒指踏入第8周牛皮，唔排除大市短期內會出現方向。恒指已經連續第7周受制周線圖保歷加通道中軸，目前中軸大約22500點，突破呢個位兼成交增加，先諗入市。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
