弱者心態
2015年12月08日
歐洲再放聲氣量寬不手軟，加上美國就業數據好，變成經濟強時加息，美股上周五出現報復式反彈，亞洲股市包括內地都有不同程度嘅反彈。在這種環境下，港股相當唔爭氣，高開後升幅迅速收窄，尾市仲倒跌，睇埋歐洲開市又升，可以話弱勢畢呈。港股乏力，一個解
釋係內地停市(內地叫鎔斷)機制出台，市場擔心內地若然停牌，香港會變成提款機，成為沽售港股理由之一。
A股停市機制變淡因
中證監日前宣佈，明年起會實施新停市機制，並以滬深300指數作為基準，一旦指數升跌逾5%，便要停市15分鐘，達到7%更要全日停市，港股通則不受影響。有市場人士擔心若A股停市期間，內地投資者會轉移目標來港沽貨或沽期指，港股隨時變提款機。
內地新停市機制成為港股無得升之理由，好反映依家市場弱者心態。內地停市機制本來係升跌都停，換言之，若然內地股市猛升搞到停市，資金都可以來港掃貨，股民現在將焦點放係跌市沽貨，皆因第二季個市猛插下來，令人猶有餘悸，再者係內地每日成交講緊幾千億，大家驚若然A股停市，在港引發的殺傷力好大。
內地市況大波動下要停市，甚至會停足成日，咁做係咪好見仁見智。有市場人士話，若然香港怕頂唔順內地掀起巨浪，係咪可以照跟呢？但咁樣爭議就好大，因為香港一向着重市場流動性，對於停市好有保留。
港交所(388) 行政總裁李小加回應時都承認，A股熔斷機制若實施，勢必對兩地AH相關股票產生影響，但亦為投資者提供新機會，惟需做好風險管控。佢又話，港股不是一個本土的市場，而是一個開放市場，任何消息均會容易對港股造成影響。言下之意，即係香港唔會照跟內地的落閘做法。
其實，股市機制係長遠問題，即時影響有限，個市昨日都只係借勢跌，息口向上，雖然本地地產股都係少跌，但人心都好弱。
美國聯儲局最近不斷放聲氣今個月考慮加息，上周五非農就業數據強勁，令加息0.25厘幾成定局，現在市場焦點唔再係美國加唔加息，依家開始玩估頂遊戲，分析美息來年要升幾多。
有銀行界人士話，香港目前水浸，美國就算呢個月加息，香港都未必跟隨，金管局總裁陳德霖就連呢個良好願望都淋熄埋。佢預計，美國聯儲局下周很大機會加息，叫市民應有心理準備本港利率會逐步上升，經濟會面對下行壓力，樓價亦會受壓，坦言隨着美國利率即將面對正常化，投資環境將日益困難。
唔單止金管局咁睇，現時大行揀股都偏向揀同美國出口相關股票多過息口敏感股。美銀美林就發表報告，看好有越南廠房投產的申洲(2313) ，下半年受惠定單與銷售強勁，以及價格平穩及營運效率提高。如果細心留意，近排大行推介都多咗留意工業股呢類同美國經濟關係大而又無咁受息口影響的股份。
炒短線要預留水位
港美財金官員不斷出口術，為加息鋪路，投資者由整體資產配置到揀股，都慢慢消化加息影響，但美國市場反應明顯好過香港。好似昨日港股高開，但全日倒跌32點，當個市升緊時，已經見到唔少股份回落，創一年新低股份數目遠超過創新高股份，而成交咁低，證明好多投資者都唔想喺加息前入市。
市場咁樣反應，道理一字咁淺，美國經濟目前仲係喺復甦之途，承受加息底子較強，港股喺經濟高點見頂回落，加息再拉多一下，自然插得更深，所以美股升、港股跌，大家炒上落，都要預留多啲調整水位啦。
陸羽仁
金融High Tea 舊文
