笑到最後：
內銀長揸神話爆破時
上星期，本欄寫金山軟件（3888）一貼即輸，過年時估唔到中國會咁兇狠，輸14%，做錯決定只能面對現實，寧願忍痛打靶好過死坐到唔知幾時。
暫時睇個市，中國的果然會爆炸，但部份績優股仲有人逆市肯買，如維他奶（345）升穿過16蚊，安踏（2020）都曾有力但
最後乏力。即係香港呢邊未係股災，股災係乜都跌，要錢唔要貨。
但係內銀股越跌越有，建行（939）穿過5蚊，周五報5.02蚊，股息率7.6厘。工行（1398）報4.35蚊，股息率7.4厘。金融海嘯之後，內銀過去息率一掂約6厘，就會出現反彈，連大市都會彈一彈。但係A股股災之後，內銀股股息處於7厘樓上，都冇人覺得佢抵而掃起收息，反而任由其股價自由滑落。內銀長揸必贏，高明唔認同。
香港自70、80年代有一隻股份叫做滙控（005），股價長升長有直至2007年，令香港股民覺得，銀行股只需要時間等，就一定會好似滙控咁，又有息收，股價又不斷上升。
錯過咗滙控嘅人，包括當年冇買一路揼心嘅人，又或者根本未出世嘅人，會將呢份銀行股長升嘅錯覺，投射去內銀股身上，覺得現時內銀股價幾蚊，就等於當年幾蚊嘅滙控，只要死揸落去，就會變成無限大。
中國漸步日本後塵
但以現時中國環境，股災後中國人民已經對中國財金系統失信心，蜂擁去換外幣，如果政府今次處理得唔好，令人民有錯覺唔可以攞番銀行入面嘅存款，可能會觸發擠提，又以中國嘅民智，情況將會一發不可收拾。加上，中央有暴力救市同埋熔斷機制往績，平心而論，喺控制預期方面唔係咁樂觀。
據講，當年中國改革開放初期，極力避免走上日本迷失之路，中國緊緊控制外滙，就係避免貨幣被大鱷衝擊。不過，近年種種跡象顯示中國正走日本舊路：銀行壞賬重、出口轉弱後無以為繼、國內大白象工程、地產泡沫面臨爆破、股災、以為自己係「世界第一」、國民出外掃貨，如果再加埋減息、刺激措施救市，中國越來越似90年代嘅日本。如果結果係變成日本，銀行會以合併嚟對付國內壞賬同虧蝕，而唔係滙控因海外擴張而併購其他銀行，股價仲點會有憧憬？
香港人對內銀股嘅判斷，可能啱咗一半，就係好似90年代某銀行，不過唔係滙控，而係當年嘅日本銀行。長揸內銀「神話」其實一路都唔神，2007年至今都冇真正派過彩，長揸神話只係一廂情願。
高明
https://www.facebook.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
