中環在線：滙豐分析師借七欖睇經濟
若新西蘭隊贏 不利製造業
■新西蘭喺2014年嘅七欖捧盃，原來竟然影響經濟。 資料圖片
一年一度嘅香港國際七人欖球賽將於本月8至10日（本周五至周日）舉行，有份冠名贊助賽事嘅滙豐今年繼續參與，更一如以往，喺賽前發表報告，集齊該行不同部門嘅分析師，齊齊
預測賽果，兼認真發掘以往賽果與不同資產兩者之間嘅關係。
滙豐嘅研究發現，新西蘭隊勝出香港國際七人欖球賽嗰一年，個別資產表現通常都麻麻哋。舉例，自2000年以來，但凡新西蘭隊勝出（包括2000、2001、2008、2011、2014年），日本以外嘅亞洲區，製造業情況都會有所惡化。而且，過往數據顯示，新西蘭隊勝出嗰年，亞洲保險公司嘅股價通常都會顯著跑輸大市。
■滙豐喺賽前發表報告，預測七欖賽果。 大熱斐濟料冧莊
於點解新西蘭打得好，成為七人欖球賽嘅強隊，會對經濟與個別板塊帶來惡運？報告就冇解釋原因，可能純屬巧合，大家都係當趣聞聽完就算，毋須太過認真。
而且可以放心嘅係，今年大熱隊伍並非新西蘭。滙豐分析師今年幾乎一面倒，預測舊年銀盃賽冠軍兼以往總共在港封王15次嘅斐濟，今次會再度捧盃。
分析師睇股市、睇經濟可能叻啲，估賽果又有幾準呢？大家可以自行判斷。2014年滙豐分析師估計大熱係斐濟，結果由新西蘭捧盃。舊年該行分析師同時熱捧新西蘭、斐濟同澳洲三隊，最後就由斐濟贏出。
其實無論邊隊贏，最重要係落場參賽與入場睇比賽嘅人，都享受現場氣氛啫！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
