智取大市：貨幣戰爭好過睇戲
■歐元區同日本希望透過滙率弱勢而刺激經濟。 資料圖片
歐元區3月份減息兼QE加碼，日本喺QE之下再推負利率，不約而同喺貨幣政策曬冷，相信歐元區同日本難以短期內收回寬鬆政策，同時進一步加大寬鬆嘅本錢亦不多，未來難以靈活地隨住其他國家貨幣政策改動而作出應變；至於
中國方面，減息恐怕令人民幣滙價走弱，貶值壓力重現，亦似無路可走。綜合嚟講，歐元區、日本同中國喺貨幣政策方面突然處於被動狀態，近年少見。至於美國方面，息率可加可唔加，有乜依鬱甚至可以重推量寬。
歐元區同日本希望透過滙率弱勢而刺激經濟，至於中國就想人民幣穩定微升以紓緩走資風險。最簡單的邏輯下，可演繹為美元強，對歐洲、日本有利而對中國不利；美元弱，對歐洲、日本不利而對中國有利。
耶倫上周二的言論顯示美國暫時偏好美元走弱嘅劇本，但局勢未必咁簡單。強美元對於中國嘅損害，有可能遠大於美元弱對於歐洲、日本損害程度，而弱美元又偏向對美國自身有利，究竟美國會取其輕而偏向美元貶值，定係政治角力上選擇送中國一程，讓美元走強觸發中國爆煲風險提升？前者機會偏高，但仍話唔埋，誇張啲講，方向決定中國命運。中資股喺好劇本之下，潛在升幅未必多，喺壞劇本之下就有頗大的下跌空間，反彈浪過後，中資股值博率實在偏低。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com
