操盤手劄記：
聯想借力AR發圍
■聯想開發了全球首款使用Project Tango技術的AR手機。 資料圖片
美國聯儲局議息結果本港時間今日淩晨二時揭盅，英倫銀行、日本央行亦係今日公佈議息結果。不過，現市場最關心係下周四公投，英國留抑或脫歐，唔止影響股滙市場，仲影響世界貿易秩序。
英國多個民調指，「疑歐派」反超前「留歐派」，英國銷量第一報紙《太陽報》更在頭版大字標題「BeLEAVE in Britain」，表態支持脫歐。內地專家普遍認為英國脫歐對中國不利，因人民幣可能跟隨英鎊展開新一輪跌浪。不過，博彩公司就認為英國留歐機會較大。
國家主席習近平昨63歲生日之際，MSCI宣佈延遲將中國A股納入新興市場指數，話主要障礙係QFII資金滙出限制及金融產品預先審批限制，美國佬似乎唔怕方丈小器！其實MSCI今次只係電話會議，唔排除年底再檢討A股入摩，總之預咗受佢玩，只係遲早問題。
A股三闖摩指撻Q，中港股市有曬心理準備，昨日都低開高收，A股收2887點，升1.6%；港股收20467點，升0.4%。港股仍會在「七·一」前炒深港通，不妨留意相關概念股如券商股、中小型科技股及軟件股，伺機低吸。
據講繼長和（001）主席李嘉誠私人嘅維港投資舊年參與矽谷AR（增強實景）始創企業Meta嘅A輪融資後，騰訊（700）及聯想集團（992）日前亦參與Meta嘅B輪融資，瑞信昨日就唱好聯想借投資Meta發展AR。事實上，聯想正在積極進軍AR市場，上周在美國三藩市舉辦嘅「Tech World2016」，展示咗兩部新智能手機，包括與Google合作、全球首款用Project Tango技術嘅AR手機Phab2 Pro。
聯想上月尾派成績表見紅，觸發拋售。Google本月初以蝕本價盡沽持股，聯想股價低見4.5元嘅四年幾低位；主席楊元慶則在月初兩度增持。其實聯想整體業務上年度第四季（即2016年1月至3月）已止血，作為科技股巨頭，市賬率僅兩倍，股息率5.5厘，幾吸引。聯想昨收4.8元，升1.7%，呈現區域上軌突破利好訊號。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
