聯局儲行返轉頭
2016/06/16 08:27:31
網誌分類: 經濟
亞洲及歐洲股市反彈，但美股臨收市甩轆，由升轉跌，連續第五日向下。不過跌幅唔大。三大指數都係微跌0.2%，杜指跌35點，收17640點；標普500指數跌4點，收2072點；納指跌9點至4835點。
聯儲局昨日結束兩日的
議息會議，決定維持利息0.25至0.5厘不變。聯儲局不會在6月加息，市場已經預咗，投資者比較關心的是聯儲局往後的加息動向，據與會的官員的表態，雖然大部份官員認為今年預計會加息兩次，但當中也有6名官員預期只會加息1次，所以，睇嚟聯儲局今年最多只會加息兩次，態度明顯比之前話會加息3至4次「鴿」好多。
Wunderlich Securities的首席市場策略師Art Hogan認為聯儲局一副行返轉頭的姿態，估計今年將會好似2015年咁，加一次息就完啦。聯儲局主席耶倫在昨日的記者會後表示，除了5月的非農就業數字只有3.8萬人，令人大失預算以外，英國脫歐公投在今次是否決定加息的其中一個因素。睇美股表現，聯儲局態度雖然顯得較為鴿派，但股市不升反跌，反映投資者對英國脫歐的關注，更大於聯儲局的加息態度。畢竟，市場對聯儲局加息的態度大致上已經有底，英國脫歐的影響卻係未知之數，自然對後者謹慎好多。
股市對今次的議息結果無乜反應，債市、美元及金市則受到聯儲局加息預期大降的衝擊。美國2年期國債收益率急跌0.67%至0.6696厘的2月中以來最低，而10年期國債收益率亦跌穿1.6厘至1.5754厘。反映美元兌6隻主要貨幣匯價的美元指數則由朝早的95.04一度下滑至94.36。金價亦繼續向每安士1300美元進發，收市報1295.3美元，係去年1月中以來最高。
我覺得隨著聯儲局加息的陰影開始淡化，市場目光將會轉往英國脫歐公投以及油價的走勢。英國脫歐公投將於6月23日舉行，呢段時間，大市估計仍會有一番波動，向下走的勢頭比較大。至於油價，紐約7月期油上周三上過每桶51.6美元之後，就開始腳軟，昨日收47.43美元，一個星期跌咗超過8%，期內市場對油價下滑無好大反應，估計係受到聯儲局議息同英國脫歐問題分散咗注意而已。市析普遍估計，紐約油價唔企穩上50美元，油價呢隻怨鬼，至唔會攪攪震。
陸羽仁
回應(0) 我想回應
陸羽仁 BLOG 舊文
來源 source: http://blogcity.me
