Money Walker：點止花生咁簡單
■英國脫歐一旦成事，滙控、電能同長建可能受累。 資料圖片
市場家陣先嚟驚英國脫歐，算係有少少後知後覺。筆者之前寫過，脫歐一旦成事，滙控（005）、電能（006）同長建（1038）可能受累，就算閣下唔炒股，你揀嘅強積金都肯定有
揸，所以脫歐一事點都會影響到你副身家。
其實今年外圍政經大事唔少，就算過到英國脫歐呢關，都仲有下一關美國大選等住大家，而且對中港股市嘅影響更為直接。野村話如果共和黨候選人特朗普登上總統寶座，會對大陸經濟同金融市場構成風險，因為佢唔止會對來自中國嘅入口貨品徵收關稅，亦會從政策方面著手，妨礙美國對中國直接投資，仲肯定會兌現承諾，將中國列為滙率操縱國。係人都知中國經濟本身已經好脆弱，內憂一大堆，如果再加多個特朗普增添外患，就算最後實質影響唔大，都肯定利淡市場氣氛，野村就提醒一旦特朗普當選，人民幣會蒙受更多貶值壓力。
民調顯示，特朗普同希拉莉嘅支持度相當接近，但睇番英國博彩公司Ladbrokes嘅賭盤，特朗普相對仍算冷門馬，因為押注希拉莉贏嘅賠率係1賠1.33，買特朗普贏嘅賠率就有1賠3.5倍。好多人都話特朗普對中國而言只係尾部風險（tail risk），因為講到底佢都只係一個商家佬，所謂「講就兇狠，做就……」，面對利益關頭，特朗普反而有機會向中國跪低。美國政治嘅嘢，筆者當然識條鐵，只知對本地散戶嚟講，美國大選絕對唔係食嚇花生咁簡單，無論特朗普選唔選到，今個秋季都有機會左右中港股市氣氛。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com
