中環在線：
陸叔忙湊孫唔得閒食花生
■陸叔前年chok住做埋model，而今年嘅新牛錶設計有中國剪紙風格。
股評人界最近因為一單婚外情事件而鬧得熱烘烘，食曬花生，資深股評人陳永陸（陸叔）似乎就唔得閒湊熱鬧，事關佢上個月又抱孫，家陣佢一共有4個寶貝孫，兩個孫仔，兩個孫女，淨係幫手湊孫
都周身唔得閒。
65歲嘅陸叔近年好多喜慶事，佢育有一仔一女，阿仔同新抱先後生咗一個女同一對孖仔，陸叔嘅大孫女都已經3歲半，陸叔女兒上月又生咗個女。最高興係，陸叔喺灣仔某富貴屋苑擁有多個單位，仔女住隔籬附近，相當方便陸叔湊孫。
噚日父親節遇著橫風橫雨，佢安坐家中弄孫為樂，都不知幾咁happy，肯定開心過低位買中騰訊（700）股票又一直未沽喇。
再出4.48萬元牛錶
講開陸叔，佢2015年食住港股大時代氣勢，幫港產陀飛輪品牌「萬希泉」設計一款「牛錶」，限量生產200隻，事隔兩年，陸叔又同萬希泉合作推出第二批「牛錶」，今批限量80隻，設計同上一批有少少唔同，錶面嘅牛，喺設計上配合中國剪紙特色，定價較上一批貴5%，每隻4.48萬元。
陸叔話，佢今年初先至有時間同萬希泉傾新設計，咁啱個市又係一路升，所得收益主要捐畀「健康快車」。不過話時話，前年嘅港股大時代相當短癮，華華希望新一批牛錶唔會又嚇窒港股喇。
李華華
mailto:LiWaWa@AppleDaily.com
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
