笑到最後：調整市預跌兩千點
■如果信奉價值投資，可以趁市跌去旅行，不需理會調整。 資料圖片
最近因做電台，要研究圖表及技術指標，始終一個每日做嘅電台節目，如果日日講長揸邊隻、基本因素，基本上個節目會冇得做。聽眾期待嘅係每日有新冧巴，如果講基本因素同鬥耐性，股神畢菲特做都做唔掂。
首次
接觸技術分析係讀大學嘅時候，有一科只得一個學分嘅技術投資班，導師開宗明義話學術派係唔信歷史數字可以解釋未來，但基於你讀金融，出到去同人講唔識睇圖，會好難解釋，所以點都要學一學。
近期最明顯技術指標命中，就係港股超買，自5月尾恒指日線同周線RSI一同超越70。5月尾已經有唔少人見到超買，提示港股會調整。雖然港股成交唔算大，但係超買完可以更超買再升，卒之去到上星期，先開始由高位26000點調整落嚟。
技術分析中咗個開頭，咁結尾係點呢？原來，港股過去三年，每年都會發生類似超買後調整，調整完之後多數都能夠走得更遠，前題係，調整時你冇被大鱷食咗。2014年7月尾RSI日線最高見80，周線RSI接近70，之後喺高位玩多一個月，恒指先大幅調整2000點，RSI日線見返30樓下先見底；2015年大時代RSI日線最高見89， RSI周線76，資金太多所以玩多接近兩個月，然後RSI跌穿幾次30先見底，但呢個例子嘅跌幅未必能完全應用，因為炒上炒得太急；2016年9月亦有類似情況，同樣要到12月RSI穿埋30，高位跌2500點。
今次港股升市唔係資金市，因為成交過千億日數唔多，亦唔見得基本因素好能夠解釋升市。捕捉破突或調整機會可能只有睇圖，先至叫做有少許能見度。既然要超買已經中咗個頭，完成埋調整，高位調整2000點，最多可以跌至24000點。
如果信奉價值投資、考耐性、實錢買正股，等今年港股炒上的話，其實上述調整可以完全不理，趁市跌去旅行放個假，避過睇市凶險一面，返嚟香港再睇股價輕舟已過萬重山，再等收錢。不過，如果炒出炒入、唔係揸正股，調整市真係要有跌兩千點嘅預備。
高明
http://www.fb.com/bigricetea
本欄逢周一刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
高明
笑到最後 - 高明 舊文
來源 source: http://hk.apple.nextmedia.com
