財金冒險號：博長和終極重組
■超人擅於捕捉市場轉角位，喺退下來之前，會否搞番場終極重組？ 資料圖片
長和系嘅電能（006）同長江基建（1038）啱啱出中期業績，盈利本身無乜特別，搶眼嘅係電能派特別股息每股7.5元，計埋今年1月公佈嘅特別息5元，半年來齋計特別息都12.5元，連埋基
本股息成300幾億，股息率20厘。
電能錢多就人人都知，去年底揸住600億現金，兩年前長建電能提出合併，外界就覺得係母公司長建想吞咗阿仔電能啲cash。合併被小股東否決，長建又等錢去海外shopping，唯有叫電能狂派特別息，似乎順理成章。但成件事係咪咁簡單？
長實地產（1113）上星期至話要改名，究竟李嘉誠有冇後著？長和「世紀重組」所誕生的長地，本來打正旗號專注地產，比起重組前嘅1號仔長實，消除咗控股折讓，長和系市值好似變魔術咁驟增，但短短兩年後，長地就想搣甩「地產」兩隻字，變番綜合企業，搞乜？另外，同系嘅和記電訊（215）即將出售固網電訊服務。
早前《華爾街日報》話超人決定明年底前退休，被長和否認，但以超人嘅高齡，雖仍然十分精靈，終須交棒，空穴來風未必無因。長和上次重組正好係2015年「大時代」期間，𠵱家市況逐漸火熱，開始多人睇恒指上三萬二，擅於捕捉市場轉角位嘅超人，喺退下來之前，會否搞番場終極重組？
笑笑生
http://fb.com/sneeringman
本欄逢周五刊出
笑笑生
財金冒險號 - 笑笑生 舊文
來源 source: http://hk.apple.nextmedia.com
