不問價追 - 小炒王梁心欣 2017年7月21日
【不問價追】不問價追飛機租賃（小炒王梁心欣）（第134期）
2017-7-20 20:30:00
中央令民企風暴來臨，不問價追專欄只會為大家搜尋國企以策安全。繼早前為大家推介過中海物業（02669.HK）後，今次為大家搵一隻同等有實力嘅股，就係中國飛機租賃（01848.HK）。
未講基本面之前，講返歷史， 中國飛機租賃2014年以5.53元上市，曾高見14.19元，因為二股東潘啟文一些私事被調查過後跌返去招股價附近，之後大股東光大嘅陳爽(人稱爽哥)就立即處理危機，親自落去飛機租賃做首席執行官，等到潘無事回來後，交返棒畀經驗豐富的潘。點解特登講呢段歷史，因為想同大家分享光大系係幾有執行同承擔能力，同系另一隻小炒王好like嘅就係光大國際（00257.HK），都係長線愈做愈好的公司，回顧過去十年股價就知道，唔使聽我講。
中國飛機租賃做咩？簡單講就係買飛機返來再租畀航空公司，大家可能會諗點解航空公司唔直接買機，因為你睇下目前東航（00670.HK）、南航（01055.HK）等負債就會知道，所以呢個行業就有存在價值，係香港上市仲有中銀飛機租賃（02588.HK），質素都唔錯。而中國飛機租賃會是更好選擇：公司除咗租賃飛機外，仲做埋機隊規劃諮詢、結構融資、售後回租、機隊退舊換新、轉售第三方飛機及飛機再生服務，即係只要航空公司想開航線開始，就可以幫手做，去到機隊退役後會再幫佢換新機，真係再飛唔返嘅飛機就會幫佢進行拆解，再把仲用得零件變賣或再生等等，係行頭裡得呢間做到咁嘅垂直整合。
睇返年報，大家就會發現目前機隊規模83架，去到2022年，根據已確認嘅訂單係173架，即係未來5年會來個double，6月時公司再同波音訂咗50架波音737MAX 系列飛機，呢個行業有機先可以租到出去，現在睇到有咁多飛機訂單，在中國航線愈開愈多情況下，公司未來嘅盈利係會繼續強勁增長。
剛剛講到買飛機，大家都知一架飛機都好貴，例如50架737MAX系列訂單就58億美元，公司市值才得62億，一定會諗點做呀？首先，飛機唔係一落單就拎到現貨的商品，係要先落訂， 再分批收貨，到收貨交付時再支付每架機嘅尾數，所以財務壓力聽起來好勁，實際上係幾易處理。而中國飛機租賃好靈活地把已成功租出的飛機未來的收款證券化，變成可供出售的金融產品，令到公司無須過份倚重股本之增長去融資，又可以拓展業務。2016 年中國飛機租賃出售了14架飛機之融資租賃應收款項，而截至6月30日，公司已成功變現了8架飛機之融資租賃應收款項，中期盈喜應有保證。
至於講咗幾年嘅飛機拆卸及再生中心業務今年下半年正式開始營運，公司係全球少數的集團，為客戶提供全面的飛機全生命周期解決方案。相信會令公司下半年業績更上一層樓。現在宣布不問價追，先睇$10.6，當大市再起飛，$12-13見吧！
不問價追 - 小炒王梁心欣 舊文
來源 source: http://www.winmoney.hk
