大刁過關 內房繼續跳舞
2017年07月21日
萬達與融創(1918) 的大刁過關，交易雖然係成交前夕現出暗湧，但買賣雙方變招甚快，引入左白武士富力地產(2777) 買走酒店資產，令計劃得以完成，融創同富力雙雙成為贏家，成個內房股板塊都可以舞繼續跳。
被喻為內房史上最重磅交
易的萬達賣產大計，周三正式簽約前出現埋門急轉彎：萬達77家酒店資產以199.06億元人民幣作價，打六折賣畀富力地產。呢個安排令萬達可以取消提供給融創的296億元委託貸款，同一時間，出售13家文旅項目資產售價就提高至438.44億元，融創要多付48%才能買到心儀的大量地皮，但係照樣去馬。
由於引入左富力，減低左本來交易雙方的借貸額，應對左金融機構針對槓桿率過高嘅排查，令交易可以過到關。融創股價收報19.64元，升14%創新高，富力都升返13.8元，升7%。
升得急要防回頭
對於畀貴左咁多去完成交易，融創聲稱439億元換萬達文旅4970萬平方米土儲，可售面積的每平方米土地成本不超過2000元，交易後融創至少增加6500億貨值。但睇番呢次交易安排，富力接手嘅酒店雖然回報率不足3%，被人話係啃「豬頭骨」，但佢做得白武士，無理由肯無端端蝕底。係啃完「豬頭骨」後，標普認為富力評級不受資產收購交易影響，可見佢嘅財力唔錯。睇番富力而家市盈率不足六倍，息率有8%，數字仲係唔錯。
過去富力負債比率偏高，為左節省現金支出試過唔派息，呢兩年內房市場好景，佢派息慷慨番，而家大手入貨，對現金流有影響。但佢喺最後關頭先至埋門，肯定應該傾到其他人睇唔到嘅好條件。
對大市嚟講，萬、融大刁能否成事，對市場氣氛都有影響，呢單交易最終成事，而且交易安排比之前穩陣啲，令市場安心左。內地A股昨日亦都造好，上證指數收報3244點，升13點。深證成指收報10366點，升71點。中美股市向好，恒指成功造出九連升，收報26740，升68點；國企指數收報10846，跌13點，成交金額905億元。騰訊控股(700) 有上有落，創新高300元後收市倒跌，微跌0.33%，收報297元，其他科網股瑞聲科技(2018) 急升5.8%，收報123.6元，前日急升嘅舜宇光學(2382) 就收報96.6元，跌左2.4%，無論個市抑或科網板塊升得急又快，隨時回吐可以好急吓。
死坐貨卡博蒲頭
冷門汽車股中國重汽(3808) 發盈喜，預期截至今年上半年，純利將按年錄得逾4倍增長，幾間大行都唱好，摩根大通將重汽目標價由8.5元，升至9元，重申「增持」評級；而中金予並目標價10元，評級「買入」；摩根士丹利重申「增持」評級，目標價維持8元，佢股價單日急升27%，收7.98元。重汽主要唔係做客車，而係集中做重卡與輕卡車，業務唔係咁性感。由於卡車銷量隨內地經濟回穩，按年分別增長強勁，銷售收入亦有增長，令純利大升。重汽股價雖然爆升，但仲未上返佢10年前上市嘅招股價12.88元，同其他汽車股比真係有啲對唔住長情股東。投資者如果死守左咁耐，到而家見到曙光，就貨卡都坐住先，無謂咁快落車啦。
陸羽仁
金融High Tea 舊文
來源 source: http://hdfin.stheadline.com
