【操盤手劄記】撐小店利科網股 - 割柑人
國務院總理李克強上月提到「地攤經濟、小店經濟是就業崗位的重要來源」，以新經濟帶動小店經濟。 資料圖片
疫情失控！本港染疫人數已超越2003年沙士嘅1,755人，周日達1,886人。現時全球染疫人數以美國居首，近390萬人；值得注意嘅係，排第
二至五嘅都係「金磚五國」（BRICS）國家，依次為巴西、印度、俄羅斯、南非，而中國則排第廿六。金磚五國原定周二喺俄羅斯開會，現因疫情押後。
由於疫情最先喺中國爆發，美國就此同中國早有齟齬，金磚國家同中國又會唔會因而有嫌隙？尤其印度，上月發生中印邊境衝突，至今仍然未講掂數。對外，中國好頭赤；對內，亦好頭痛。雖然中國第二季GDP由負轉正，增長3.2%，成為全球第一個走出疫情陰霾嘅國家；但細看經濟結構，6月基建投資放緩，消費更無回升。就業方面，6月失業率為5.7%，當中，畢業生失業率達19.3%。
就業係六穩、六保之首，問題係點穩、點保？上月，總理李克強喺山東煙台考察時，提到「地攤經濟、小店經濟是就業崗位的重要來源」；不過，地攤經濟出台一周就走鬼。上周，輪到小店經濟出場，商務部等7部門聯合印發《關於開展小店經濟推進行動的通知》，以穩就業、促消費。《通知》要求電商平台、物流企業、商貿企業等「以大帶小」，既鼓勵電商為小店提供批發、移動支付、軟體系統等數碼服務，又鼓勵小店在線集聚，拓展雲逛街、雲購物、雲展覽等活動。換言之，以新經濟帶動小店經濟。地攤蛻變小店，或者話網店，呢個新政，受惠股其實無變。
科網股如阿里巴巴（9988）、騰訊（700）、美團（3690）、京東（9618），都已推出扶持小微商戶計劃；另外，微盟（2013）嘅SaaS（軟件即服務）亦有助小店營運，不妨留意。
割柑人
本欄逢周二刊出
操盤手札記 - 割柑人 舊文
來源 source: http://s.nextmedia.com
