金融High Tea——期望管理最重要
2013年3月27日
■統一早前一直吹樂觀空氣，期望管理未做好，搞到本來有過去5年最高的8.56億純利，依然大插逾一成。圖為主席兼執行董事羅智光。
大陸市場水多，人民銀行開始正回購320億元(即從市場抽水)。一聞抽水聲，上證綜指即跌1.3%，但港股呢期好威，頂住大陸跌勢，不跌反升59點，升幅0.3%，港股正在炒業績或業績回吐後的反彈。
公司公佈業績好未必有得升，但公佈業績唔符合預期就一定跌，統一中國(220)昨日中午公佈業績，去年純利8.6億元人民幣(下同)，已比前年3.1億純利大升174%，但其派息比率調低之餘，業績亦遜於市場預期的9億元。統一午後急瀉，只見基金係咁拋貨，最低曾見8.52元，收市微彈番上8.59元，仍大插14.8％，一隻300億市值咁大的股票咁跌法，真係命都無。
美銀美林分析統一業績時話，佢去年盈利8.56億元，低於該行預期的9.78億元，主要因為去年第四季推廣費用增加，但下半年收入增長32%，高於該行預期的26%，不過公司派息比率由前年的30%降至20%，因資本投資增加所致。
壹仔停牌無得走
統一8.56億純利，已是過去5年最高，仍低於預期，多少反映公司早前一直吹出樂觀空氣，市場預期才會咁高。唔能夠管理好期望，消息一令人失望就難免急跌。統一現價唔便宜，以2013年估計盈利計市盈率都有23倍，若去年第4季開始業績不理想，有少少擔心佢今年再放慢。統一去年12月見高位10.44元，前兩日再見高位10.22元，似一個雙頂，昨日急插，一枝大陰燭跌落嚟，高位已見，未來都係要反覆尋底。揸住呢啲二十幾倍市盈率的貴股，勢色唔對就要走。
另一隻股有大跌之險的是壹傳媒(282)，但它停了牌，股民想走都無得走。壹傳媒以46億沽出台灣業務的交易協議期限，原本今天到期，但傳聞台灣買家旺旺蔡「甩底」，交易可能告吹，壹傳媒昨日開市前宣佈暫時停牌。呢個交易最惹火的部份由旺旺蔡一系持股32%，由於旺旺蔡已擁有《中國時報》，今次想買埋《台灣蘋果日報》，馬上引發台灣反媒體壟斷運動，有關收購要台灣公平交易委員會審議，但如今公交會都未審完，旺旺蔡已退場，雖然有傳聞係佢喺玩退場想講價，但真係唔好假設交易最後會完成。
壹仔賣台灣盤不成，就兩頭着火，台灣電視業務繼續一年蝕10億港元，香港爽報亦唔係幾掂，連番減紙，由去年每日發行90萬份減到60萬份，近期再減到55萬份，估計每年仍要蝕1.5億至2億，即係台港兩大蝕本業務一年漏水12億，估計台灣和香港《蘋果日報》每年賺4億，一減一加仍有高達8億，蝕本缺口，所以最快止血的方法，就是先單獨賣掉台灣電視業務。估計壹仔復牌後，股價有得插，但若然插得不夠深，唔好去撈底，小心第二棍先至殺人呀。
長和超標超人風騷
昨日還有一大堆業績，基本上內銀業績唔錯，中國銀行(3988)公佈去年純利10,394億元人民幣(下同)，好過市場預期的1,325億，按年增長12.2%，去年市場擔心中行今年只有單位數增長，結果又有雙位數驚喜。不過旗下中銀香港(2388)去年純利209億，按年只升2.5%，可見息差收窄，香港銀行生意難做也。另外農行(1288)公佈去年純利增19%至1451億元人民幣，差少少仲有20%增長，內銀真係做番場好戲喎。
長和系公佈業績，亦都相當靚仔，主席李超人好風騷。和黃(0013)去年純利261億(前年有出售碼頭利潤，故純利高達560億)，好過市場預期的240億，主要受歐洲3電訊業務增長帶動，但派息和往年一樣。
長實去年純利322億跌30％(主要受子公司和黃不再有特殊盈利影響)，遠超過市場預期的257億。若扣除和黃貢獻計，長實盈利191億，比對上一年賺181億升5.5％，主要是租金收益增長抵銷房屋銷售量下降影響。
睇埋中銀香港同長和系本地業務，你會發現香港生意唔係咁好做，有點位高勢危，要賺錢都係外地容易啲。
陸羽仁
上一頁 下一頁
金融High Tea 舊文
