中環在線：阿里入股Tango彌補「來往」發展慢 - 李華華
■楊致遠(左)推薦馬雲(右)入股Tango，應該冇介紹錯啩。
阿里巴巴創辦人馬雲又買嘢，今次唔係買殼，而係買流動應用程式(App)。阿里噚日宣佈斥資16.8億元入股即時通訊App Tango，呢個App喺北美、中東、台灣同埋新加坡比較流行，有2億註冊用戶。馬雲可能嫌自家嘅即時通訊App「來往」發展得慢，決定投資其他通訊App，盡快搶佔據點。
雖然馬雲拍板將阿里巴巴安排喺美國上市，但佢在港買咗中信21(241)同文化中國(1060)兩隻殼，一日未知佢想點，市場都依然關注佢嘅動向。
楊致遠搭路進軍歐美
facebook上月先至斥巨資1,482億元買入Whatsapp(有4.5億活躍用戶)，阿里𠵱家投資呢個即時通訊App，原來與阿里主要股東雅虎創辦人之一嘅楊致遠有關。經楊致遠介紹，阿里投資16.8億元，楊致遠跟其他投資者投資5億元左右，令到Tango今次成功籌集合共21.8億元(2.8億美元)。
市場估計，阿里呢次收購有助拓展版圖，需知道歐美嘅即時通訊市場已經被Whatsapp佔據，facebook買起Whatsapp之後，後盾更強。騰訊(700)旗下微信都叫做好勁，但老闆馬化騰前日都話主力喺東南亞、非洲、拉美等市場做推廣，似乎費事嘥精神爭歐美市場。阿里嘅來往唔算人氣，遑論爭海外市場，投資其他App的確比較明智。加上阿里準備赴美上市，做咗呢單刁可以進一步提高知名度，話唔定對上市時估值都有幫助㖭呀。
李華華
mailto:LiWaWa@AppleDaily.com
上一則: 樂香園：阿里巴巴與上市大盜 - 密西比
下一則: 中環在線：火鍋股擬上市呷哺呷哺下季來港 - 李華華
中環在線 - 李華華 舊文
