中環在線：艾爾敦細說七欖今年睇好斐濟 - 李華華
■艾爾敦
雖然臨近三月底基金季結，但好多基金經理、分析員、賓架本周五可能選擇提早收工，事關周五至周日係每年一度七人欖球賽，又係大家睇波兼開派對玩餐飽嘅日子。有份贊助比賽嘅滙豐近年都會喺賽前出個抵死嘅七人欖球分析員報告，今年都唔例外，滙豐前大班艾爾敦(David Eldon)仲細數那些年嘅欖球點滴。
七人欖球賽首次喺1976年在港舉行，艾爾敦第一次入場睇就係1980年，即係足足34年前！佢話當年自己仲係新仔一名，任職集團海外營運部門(Overseas Operations)，太過低級，仲未可以坐入去滙豐嘅包廂。佢只係跟一班朋友，邊飲啤酒邊睇比賽。往後艾爾敦喺滙控扶搖直上，仲做埋滙豐銀行主席，至今一共出席過廿幾次現場比賽。佢盛讚，咁多年嘅比賽氣氛都相當一流。
至於今年邊隊贏，佢貼強隊斐濟，新西蘭睇落都唔弱。艾爾敦嘅睇法同一眾分析員都好相近，18名滙豐分析員裏面，7位貼斐濟贏，其次係英國，香港隊都獲一位分析員垂青。
分析：薩摩亞贏恒指升
滙豐分析員相當鬼馬，專登為呢份報告著曬欖球衣影造型照，做分析時當然都唔似平時咁正經，例如，房地產分析員估計，個個去到球場都只會講樓價，討論𠵱家買樓還是賣樓好之類。
滙豐研究部亦善用佢哋龐大嘅資料庫，發現七人欖球賽果同經濟、股市有些微關係。其中一點，股民一定感興趣，就係太平洋島國薩摩亞(Samoa)贏嗰年，恒指就會升，呢隊分別喺2007同2010年勝出，嗰兩年恒指真係升，唔知薩摩亞會否因此多班股民擁躉呢？
李華華
mailto:LiWaWa@AppleDaily.com
■八十年代七欖場內嘅贊助牌仲係標「Hong Kong Bank」(箭嘴示，滙豐以前簡稱)。
上一則: 信銀跨境業務增人幣存款升六成
下一則: 中環在線：國泰做慈善義賣「微笑欖球」 - 李華華
中環在線 - 李華華 舊文
