屠牛再殺熊
2014年03月25日
港股今個星期結算，加上係3月份季結，有分析認為係基金砌吓盤數，整靚份季報表交功課，港股出現第二日反彈。
除了交季績因素，上個星期陸羽仁講起，話大戶殺落兩萬一水平，已經清咗大批熊證，睇嚟有可能反手，殺番一輪牛證，話口未完，恒指連彈兩日，昨日仲愈升愈有。
按照呢個估計推測，熊證密集區仲有幾百點距離，唔排除大戶會趁結算日子再推高一浸，殺埋呢批熊友先。
手機股波動考膽識
大市反彈，中資金融股乘勢發威，帶動港股延續升勢。午後港股愈升愈有，尾市最多升430點，挨近全日高位收市，收報21846，升409點；國企指數收報9694，升267點，惟成交縮減咗。
上星期紛創低位的中資金融股近乎全線反彈，中港證券股表現普遍向好，海通證券(6837) 差不多升4%，另外本地證券股好似新鴻基公司(086) 表現唔錯，南華金融(619) 急升15%後仲停埋牌，市場傳緊係賣盤，仲講緊個價錢幾好𠻹。
本地證券行業同銀行業差唔多，地頭龍係外資同中資紛紛進軍下，覺得日漸難搵食，與此同時，內地資金就好有興趣係香港收購，咁樣一樣可以有齊所有需要的牌照，仲有客路同員工，好快可以開檔。
對佢哋嚟講，只係香港生意當然唔夠做，但係香港搞咗個檔口後，就可以返內地吸客，所以不少中資都有興趣收購香港的證券公司。家香港上市公司個殼值成3、4億元，假如係證券公司，價錢仲會高啲。
個市穩番，市場傳出手機股通達(698) 傳以折讓價批股，另一隻手機股酷派，上星期宣佈業績後出現三連跌。手機股累積升幅大，一有意外消息股價就隨時插一插，賣呢類股的投資者，最好係腦下垂體發達的愛冒險者，若然自問心血唔係咁夠，最好就係落定止蝕盤，到位就止蝕或減磅，咁就晚晚瞓得着，投機都唔會咁傷身！
長和派錢多過財爺
上個星期，和黃(013) 宣佈出售屈臣氏股權予新加坡主權基金淡馬錫，和黃與長實(001) 齊派特別息7元，復牌後股價卻不升反跌，和黃挫5%，造101.6元；長實則反覆升0.3元。
長和一向派息比率唔高，基金持貨主要係追求增長，咁多年嚟管理層亦不負眾望。今次和黃套現四百幾億元，決定慷慨回饋股東，和黃派發近三百億元，長實收到股息後為了追隨和黃派7元，結果「派突」貼錢。中環茶友計過數，笑言今次長和系狂送高息，計埋有成三、四百億元，總數隨時多過《財政預算案》派糖，財爺今年話要減甜，長和系就勁派股息，小股東唔止食糖，鋸鮑魚都應該無難度，點解市場會有咁反應呢？
大股東慷慨派錢，照計無理由不受歡迎，市場解讀係上市計劃推遲咗，同時賣畀淡馬錫個價無市場預期咁高。陸羽仁就認為，和黃今次快手快腳引入淡馬錫，對方有頭有面，個價點都要有些少甜頭，尤其家只係第一浸，兩、三年內上市個價應該仲高。從呢個角度睇，今次和黃沽貨價係打底價唔係摸頂價，唔應該叫做平。
至於股價不升反跌，唔係因為賣得平咗，家因為好多大行本來想做承銷商，希望有份食大茶飯，自然摩拳擦掌炒高個價營造氣氛啦，點知場大龍鳳突然話要押後，佢哋失望之餘，自然沽番啲貨先啦，不過，和黃講明要搞分拆反映公司價值，即係唔覺得家股價啦，日後仲有可能出招，所以經過一輪消化，派高息的刺激會再反映出嚟都唔定！
陸羽仁
金融High Tea 舊文
