金手指：14大陸 = 07美國 - 孫柏文
■內地信貸泡沫越來越大，筆者分析指，這是內地要解決經濟難題的首要任務之一。資料圖片
噚日滙豐中國採購經理指數好差，特別係民營企業生意萎縮。數據一出就有好多人不論本地或海外，都喺度估究竟中央會推啲乜救市措施、額度會幾大等。係囉，又四萬億元基建，又十萬億元嘅貸款呀？你估大陸無啦啦要勒緊信貸為乜？咪就係之前經濟一少少向下就搞乜振興措施、胡亂放貸、資金嚴重錯配，有得放或借貸嘅人就瘋狂貪汙。呢次中共面對嘅信貸泡沫係大到令中共政權自己有「能否繼續存在」嘅問題。再加大個泡沫救市嘅話，嗰啲叫杯葛六四燭光晚會嘅城邦派，嗰啲手持龍獅旗嘅社會運動家就會如願以償！胡溫十年，原來埋下你哋心願嘅種子。
習李要解決信貸泡沫
習李上場，基本上首要就係tackle呢個胡溫留落來嘅信貸泡沫。亦解釋點解呢半年國家政策好似冇乜料到，唯獨是大陸金融業翻天覆地，關於信貸系統嘅新政策及消息日日新鮮鑊鑊甘！政策上，有人類歷史以來，唯一能堵截及預防胡亂放貸同資金錯配，就係要放貸人睇錯時輸錢被懲罰。由所羅門王年代已經係咁，所以就算你覺得強如今時今日嘅中共，都要屈服於呢個現實下。
所以大陸啲煲仲要繼續爆，啲採購經理要有排悲觀，直至到啲採購經理見好多行家被炒，香港班財閥見價靚仲要國家懇求下，拎錢大量收購國內資產，先至整番好個信貸系統。
2006年時，我寫過一篇題為「花旗國樓市將會慘過八萬五」嘅文。篇文出街後，有前輩喺佢自己專欄開名兼點嗰篇文，話係自瀆文章，亦有大把網友喺討論區留言話：「x！嗰個xx有冇睇數據㗎？美國樓市總體喺戰後都未跌過㗎？喺到亂噏，《蘋果》都唔知點解要搵埋呢啲垃圾寫嘢！」我只可以話，我今日對大陸信貸系統嘅感覺，就同我喺2007年對花旗國嗰個一樣，因為同一樣嘅炸彈已埋，只係爆嗰陣嘅樣會有乜唔同。
孫柏文
獨立股評人
http://facebook.com/shuen
本欄逢周二刊出
上一則: 青心直說：人民幣有隱憂 - 胡孟青
下一則: 一周兩件：博三江翻一番 - 錢雋
金手指 - 孫柏文 舊文
