壞消息入貨
2014/3/25 上午 10:05:00
網誌分類: 經濟
美股和港股昨日一個正路，一個「反常」。中國經濟唔好，但港股照升。匯豐銀行公佈的中國3月製造業採購經理人指數(PMI)由上月的48.5下降至48.1，低於市場預期的48.7。匯豐銀行首席中國經濟學家屈宏斌稱，這個結果「表明中國經濟增長動力持續減緩。」分析普遍猜測內地經濟狀況迅速惡化，有指今季的經濟增長可能唔過七，阿爺唔太可能坐視不理，雖然未必會採取激進行動，但或者會稍微放鬆流動性，或者稍微加快一點基礎建設投資。
昨日大升早段升400幾點，一出匯豐PMI就插，最少升得100點多啲，但之後反覆挾番上，收市又升4舊。可能是大戶借機挾淡倉，也可能是投資者就將壞消息當好消息炒，數據唔靚仔，壞消息出到七七八八就入貨。你睇港元滙價亦轉強，美元兌港元滙價近日從高位7.766水平高位回落至7.756，顯示有資金流入，好大機會係買貨。
投資者見到預期咗的壞消息出現而入貨，相同的邏輯是見到預期咗的好消息出現而沽貨。好似和黃(0013)
一直預佢分拆屈臣氏，最後突然賣股俾淡馬鍚，推遲分拆上市，和黃派7元特別息，派咁高特別息當然是好消息，但一下子將分拆屈臣氏的消息消耗掉。所以記住，股市是炒夢想，炒預期。 美股大路少少。美國3月製造業都係唔係幾得，Markit製造業採購經理人指數(PMI)初值為55.5，差過預期的56.5。美股走勢就比較正路些，經濟數據唔得，大市先升後回。午後聯儲局舊金山聯儲行長威廉姆斯反駁聯儲局將提早加息的睇法。大市反彈，收市收復大部份失地。杜指第二日向下，微跌0.2%或26點，收16277點；標普500指數跌9點，收報1857點，跌幅0.5%。納指則受生物化學股大跌4%拖累，跑輸大市，跌50點至4226點，跌幅1.2%。
聯儲局主席耶倫上周在議息會議後表示年底會完全結束歷年超過4年的量寬政策，當被追問幾時會加息，她回答要視經濟狀況而定，最快可能會在明年春天。嚇到全球投資者，尤其係新興市場的投資者腳軟。昨日，舊金山聯儲行長威廉姆斯接受《華盛頓郵報》採訪時，反駁了聯儲局提早加息的觀點。佢話市場預期只是預期而已，但見唔到任何跡象表明，將會提前開始緊縮貨幣政策。耶倫最近的言論，只係聯儲局對近期好過預期的失業率的回應，並不代表貨幣政策的轉變。利率上升反映了經濟狀況變好，經濟輕微好轉，利率可能只會比市場此前想象的略高一點而已，對投資深影響唔會好大，經濟改善反而對投資有正面效應。
回應(4) 我想回應
陸羽仁 BLOG 舊文
