魚樂無窮：兗煤上演醜股大翻身 - 唐牛
■滙豐編製中國3月PMI創8個月新低。
滙豐編製中國3月PMI創8個月新低，中港股市竟然越升越有，資金對中資股由嫌棄mode轉為憧憬mode，憧憬嘅就係阿爺會繼續出手救市。內銀、內險、券商、內房等師奶愛股全線造好，噚日推介嘅中信証券(6030)亦成功突破下降軌，向18元目標進發。既然中資股有轉勢跡象，就千祈唔好拗頸，寧願跟紅頂白，擁抱舊經濟概念股才是王道。
今日推介煤炭股兗煤(1171)，原因五個字講曬︰醜股大翻身！有幾醜？由2011年高位計起，累積跌幅超過八成，殘爆！點翻身？最新公佈全年業績，盈利喪跌87%至7.8億人仔，看似樣衰，但如果單計第四季，其實大賺14億人仔，靚絕！年度化盈利達56億人仔，相當於2012年嘅七成，但現時股價只及當年(2012年平均價)四成，落後得過份。
摩通發表報告，直指兗煤業績勝預期，尤其山東業務下半年夠曬靚仔，加上預期煤價已見底，故將兗煤評級調高至增持，目標價8蚊，以噚日收市價5.99元計，潛在升幅34%，以家陣資金瘋搶中資情況睇，達標只係時間問題。
同場加映將夥拍雲頂於韓國開賭嘅藍鼎(582)，日前宣佈收購濟州凱悅酒店，間接取得賭牌，意味項目可全面上馬，噚日一度突破圓底頸線，一旦成功企穩，炒上一蚊冇難度。
唐牛
上一則: 板塊尋寶：十倍股是如何煉成的 - 王昇
下一則: 股場放大鏡：A股漲停北辰有排炒 - 歐陽風
魚樂無窮 - 唐牛 舊文
