中環在線：新證舊生會飯堂易主馮景禧畫像要搬家 - 李華華
■一眾新證舊生會成員在新證美食與馮景禧畫像(箭嘴示)合照。
老一輩嘅經紀應該知道，中環有間由新鴻基證券「舊生會」喺1997年開辦嘅小型中餐館「新證美食」，裏面放咗好多新證創辦人馮景禧嘅珍貴舊相，仲有一幅畫像。舊生會最近將餐館頂咗畀𠵱家嘅經理同大廚，既然唔再跟新證有關，舊生會亦要搵地方收藏馮景禧嘅相片與畫像。
新鴻基證券有「金融界少林寺」之稱，新證舊生會嘅成員粒粒皆星，包括港交所(388)前主席夏佳理與前顧問盛善祥、貿發局主席蘇澤光、馬會前主席陳祖澤、老行尊張天生等等。
為聯誼聚腳而設
馮景禧於1969年創辦新證，佢哋就係喺當年或者七十年代初加入，感情深厚。馮景禧1985年去世，兒子馮永祥後來賣走新證，十幾位舊生會成員就喺1997年搞咗呢間新證美食，作為聯誼聚腳點。
新證美食唔係會員制，預訂就可以幫襯。張天生透露，新證美食喺中環兆英商業大廈嘅地方，當年就係由馮景禧老友──恒基地產(012)主席李兆基同埋馮太提供。
由於呢班舊生會成員嘅年紀越來越大，唔想再花心思經營，所以計劃將呢間餐館頂手，咁啱打理開嘅經理同大廚想做，最近就接手。新證美食將會改名為新聚會。既然唔再跟新證有關，新老闆打算執過呢個地方，搬走馮景禧嘅畫像同舊相，新證舊生會嘅成員就忙住搵地方收藏佢哋嘞。
其實呢批舊相真係好有歷史價值，需知道馮景禧、四叔與新地(016)創辦人郭得勝當年有「新鴻基三劍俠」之稱，三人喺1963年創立新鴻基企業，幾年後分道揚鑣，先至分別有新證、恒地與新地。呢批舊相記低好多佢哋後生時出席各類活動嘅情況，實在值得好好保存。
李華華
mailto:LiWaWa@AppleDaily.com
■(左起)馮景禧、郭得勝與四叔當年號稱「新鴻基三劍俠」。
■四叔(右)曾與黃宜弘在餐館內大展歌喉。
■馮景禧(左)人面廣，估唔到餐館亦有他與誠哥的飯聚合照。
上一則: 國策解碼：平度血案揭改革艱巨
下一則: 中環在線：曾淵滄曬命多隻藍籌幾蚊買 - 李華華
中環在線 - 李華華 舊文
