殼香四射
2014年03月26日
港股急彈一日後，點都要唞唞氣，尤其華爾街股市前晚回落，美國網企股份有調整，搞到港股都奄奄悶悶。收市後歐股開市造番好啲，睇吓跟住外圍表現，會否幫大戶繼續夾上。
昨日陸羽仁講起大戶殺完牛再殺熊，手快快寫咗「大戶殺落兩萬一水平，已經清咗大批熊證，睇嚟有可能反手，殺番一輪牛證」，牛熊互相掉轉咗，多謝心水清的讀者函電交馳提醒。
講開殺牛又殺熊，呢排投資者買大股，唔好彩企錯邊，好易被人打完左面打右面，反而短炒細價股，有批散戶炒到如癡如醉，搵到餐食。
好似前日隻南華金融(619) 急升後停牌，跟住公司披露表示，再有中介人接觸公司，對控股股東出售持股表示興趣。股份復牌急升逾8%至0.265元後一度倒跌，不過到收市又輕微回升番2%。
跟炒要防嫁錯郎
南華金融今次聽聞係有內地證券公司洽購，出價算係唔錯，有相當成事機會。有行內人坦言，家本地經紀行生意難做、賣殼易撈，一個靚殼等閒值3、4億元，好似南華金融本身有啲物業資產、又有盤生意，價錢自然高好多。
除咗佢之外，另一隻狂升差不多一倍的安利時(339) ，都係成個「殼樣」。佢業務係金融證券，去年公司投資有94%係香港上市投資組合，成個資產負債表炒埋幾千萬，若講前景真係無乜睇頭，但若從賣盤選美，佢就係一隻靚殼，唔知係咪咁樣，股價就被人炒起。
殼股炒賣香氣四溢，但都唔係完全無風險，最忌係撞着大股東掛住自己跳船，賣股唔使全面收購，又或者搵唔到好人家，揭咗底牌出嚟無乜概念，咁就好似靚女嫁錯郎，本來想搵張長期飯票，點知最後人又無、錢又無，害咗終身幸福，所以跟風炒賣呢類股份，只係可以細細注，希望搵兩餐。
中環茶友話，內地經濟仲係換檔期，金融體系又搞緊去槓桿化，大股都好難可以大幅炒上，大戶唧上唧落都係為搵兩餐，家無大茶飯食，小投資者喺鱷口游來游去，唔容易有肉碎食，仲好易變埋點心，反而內地暫時仲係好多資金湧落嚟香港，有啲係想買殼搞注資，有啲只係擰住多少資金博大霧，但佢哋點講財技點都無搵慣食的本地同外資大鱷咁犀利，加上佢哋都帶咗多少本錢嚟玩，所以近排炒股仔，都仲有番多少氣氛。
網企要跟外圍走
外圍網股唞氣，香港科網股為跌市災區。龍頭騰訊回吐5%，收報558.5元，為表現最差藍籌，各類相關概念股紛紛回落，金山軟件(3888) 跌4%；手遊股博雅互動(434) 大插近10%；創新支付(8083) 急瀉9%。「小米概念股」通達集團(698) 配股，每股作價1.12元，股份收報1.15元，挫10%，叫做守於配股價上。
中港科網股基本上係睇住外國同行嚟炒，撞正美國科網股要消化，佢哋自然無運行。
由於失去龍頭板塊帶動，兼且人行收水停不了，周二再進行260億元人民幣正回購，大市連升兩日後斷纜。恒生指數收報21732，跌114點；國企指數收報9690，微跌4點，成交縮至667億元，有小小乾乾哋感覺。
陸羽仁
金融High Tea 舊文
