買市不買股
2014年07月23日
內地本周將有11隻A股IPO進行申請認購，市場預計會凍結不少資金，中國Shibor升穿5厘水平，人行暫停正回購，釋放寬鬆貨幣政策訊號，令市場添憧憬，內地股市多數板塊上升。港股唔聲唔聲，一日就抽高咗接近四百點，創咗今年新高，即月期指收報23789點，勁升463點，高水7點，成交7.02萬張，五窮六絕無出現，七至今就算係翻咗身，淡友就被人夾咗一鋪勁。
上星期內地公佈增長數據接近目標，但市場對優於預期嘅「好消息」無反應，反而昨日央行停止抽水，個市就爆上，藍籌股好多都升，但主力係中資股份。
指數基金交投增
人行暫停正回購操作，帶挈中港股市雙雙起飛。內地滬深兩市齊飆逾1%，恒生指數升近四百點，國企指數跑贏恒指，全日急彈逾2%。大市交投轉旺，全日成交大升至逾七百億元。市場人士認為，後市需留意港股能否獲成交配合兼企穩23700點，若能企穩該位，恒指將可邁向去年12月初高位24111點。
恒指昨早高開78點後動力轉強，呢個已經係期指淡友嘅跳車機會，好快恒指接連上破23600點及23700點，尾市升幅擴大至416點，觸及23803點，恒指收報23782點，急升394點；國指收報10605點，升249點或2.4%。恒指升得咁靚仔，主要靠四大藍籌發威，周五出中期業績的友邦(1299) 創上市新高曾見41.05元，收報41元，升逾3%；匯控(005) 升1.3%，造80.1元；近排一改頹勢的中移動(941) 漲2%，報83.35元；港交所(388) 亦漲2.1%。港交所近年盈利增長乏力，股價唔係咁得，但今年因為新公司上市數目大增，最重要係有滬港通概念，令佢股價大漲小回，如果佢保持住強勢，對後市信心就會大啲。
喺大市升上今年新高，值得留意係同指數掛鈎的基金，成交都相當唔錯，好似安碩A50中國(2823) 同南方A50(2822) 都有超過十五億元成交，有金融界人士話，呢啲同內地有關的掛鈎基金，近排好似多人買咗。呢類基金投資對象分散，變成買市不買股，主要係同宏觀政策及市場有關，成交好轉代表有投資者想進入呢個市場，而唔係睇好個股，咁啱有資產管理發表投資者信心指數季度調查報告，都話結果顯示投資者信心經過上季下跌後回穩，第三季度回升6點至121點。呢幾樣嘢係咪有乜微言大意，大家不妨留意。
今年內地股市表現麻麻，壽險股都係呆呆滯滯，唔見得有特別表現，以國壽(2628) 為例，港股創咗今年新高，但係佢距離一年高位25.8元仲有相當距離，反映佢受內地股市不振影響。
內險股仍算落後
呢鋪由於A股發威，內險及中資證券股表現算唔失禮。國壽彈咗3%，報20.85元；平保(2318) 升2.5%，報59.7元；太保(2601) 、新華保險(1336) 均升逾4%。如果個市好轉，就要睇吓佢哋可唔可以追落後嘞。
陸羽仁
金融High Tea 舊文
