中環在線：和黃除牌
超人同13號仔拜拜
■小股東陳仲翔（左圖）話希望李嘉誠能活到113歲，繼續帶領公司。 謝榮耀攝 
87歲「超人」李嘉誠旗下長和（001）與和黃（013）嘅世紀重組，噚日上演重頭戲，由和黃小股東開會投票決定贊成
合併與否，有小股東希望超人可以好似長和、和黃兩隻股票冧巴夾埋，活到113歲，𠱁到超人笑曬講多謝。可惜，和黃除牌後，股票冧巴至少要過冷河1年，超人要同13拜拜了。
和黃噚日下晝兩點舉行股東會，約有800名小股東出席，現場氣氛相當平和，提問嘅小股東主要關心碎股問題，事關長和與和黃合併後，和黃股東每股只能換到合併後長和0.684股，肯定要處理碎股，和黃已安排兩間證券行可以幫股東處理。
小股東盼超人活到113歲
會上有一段小插曲，就係有一名股東交問題紙提問，實際上佢係𠱁超人，指「長和冧巴係1，和黃冧巴係13，加埋係113，但願超人能活到113歲，繼續帶領公司」，超人聞言笑到合不攏嘴，即刻合手回應說，「我盡我能力，多謝曬」。話時話，超人113歲嘅時候，咁「小超人」李澤鉅都77歲喇。
有位叫陳仲翔（Danny）嘅仁兄喺股東會後就自爆，係佢希望超人活到113歲。陳仲翔不是誰人，正是超人細仔「小小超」李澤楷旗下電盈（008）嘅忠實小股東，佢喺電盈股東會經常有出位提問，搞到小小超都認得佢。
的確，長和「1號仔」與和黃「13號」呢兩個冧巴已經深入股民心，基本上一講冧巴實知講乜，長和與和黃合併後，和黃將於6月3日除牌，由長和以介紹形式分拆上市嘅長地同日掛牌，最理想當然係畀長地用13呢個股票編號喇。
但可惜，根據港交所（388）內部規定，上市公司除牌後，有結算相關嘅善後工作，股票編號至少要過冷河1年，最快都要11個月，唔能夠立即轉畀另一間公司，換言之，超人唔可能轉頭攞番13呢個冧巴，頂多係捐100萬元畀公益金，揀個指定靚冧巴畀長地。
長和重組過關 股東最關心碎股
長和（001）與和黃（013）嘅世紀重組噚晚宣佈過關，獲得和黃超過99%嘅小股東贊成通過，兩間公司將於6月3日正式合併為長和。超人噚日喺開會前先派喜訊，指「兩間公司加埋嘅派息比例，係應該會增加嘅」，佢又相信繼任人會繼續全心全力為股東創造更好收入。
噚日現場嘅和黃小股東更關心碎股與換股安排，事關長和股東係一股換一股，和黃係一股換0.684股長和。針對碎股，和黃已經安排富昌與一中兩間證券行幫和黃股東買賣碎股，費用由和黃負責。
至於不足一股嘅零碎股（假設小股東得一股和黃，實際唔會收到0.684股），就由中央證券登記集合市場所有零碎股賣出再畀番錢小股東。
中央證券登記董事總經理鍾絳虹補充，佢哋將會向實物股東寄出兩張股票，一張係碎股數目，另一張係完整手數，股東可自行處理碎股。若然小股東怕寄失，想親自領取股票，可於5月底前寄信通知中央證券登記。
蟬聯華人首富 李嘉誠：最緊要心中富貴
《福布斯》中文網咁啱喺噚日宣佈《2015華人富豪榜》，「超人」李嘉誠蟬聯榜首，當然有小股東恭喜佢喇，超人都話好開心，不過佢強調：「呢啲嘢，人哋講幾多就幾多，最緊要就係心中富貴。」
根據福布斯嘅華人富豪榜，超人財富增加7.4%，以2,597億元（333億美元）淨資產排第一，恒基地產（012）主席、「四叔」李兆基排第二，新鴻基地產（016）大股東郭炳江與郭炳聯兩兄弟就排第七。
有人問超人怕唔怕將來身家俾人追過，超人就回應話「有人叻過自己，我歡喜呀」，果然係富貴於佢如浮雲！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
