女神tea time：吼謝霆鋒漢傳媒
■趙薇憑《親愛的》拎金像獎影後，點知隻阿里影業停牌冇得炒。 劇照
《大時代》噚晚重播，港股噚日收市跌558點慶祝。後市正如大家所知嘅「港股A股化」，睇好定睇淡，一切睇阿爺取態。中證監星期五鼓勵沽空，星期六急急腳澄清，星期日再大幅降
準。成件事好似一對曖昧男女，原本個女諗住食住個男，玩忽冷忽熱，點知呢個時候個男嘅就忽然極度冷淡，女嘅就雞咁腳補鑊，又嗲又𠱁。中證監就好似個女仔咁，揭曬底牌畀人，話俾人聽自己先係最怕個市冧。
趙薇拎金像獎影後，點知隻阿里影業（1060）停牌冇得炒。咁影業股唔係得佢一隻有得炒嘅，仲有趙薇個friend謝霆鋒入主嘅漢傳媒（491）。眾所周知謝霆鋒由英皇楊受成一手栽培，至於楊受成早前將新傳媒（708）甩手畀許家印。楊受成有能力搵到許家印呢位實力買家，相信佢都會睇住霆鋒，介紹啲富豪畀佢識。要令一隻殼壯大實力，最方便就係引資，以霆鋒嘅人脈，就算引入明星都唔係冇可能。謝霆鋒入手漢傳媒後，根本未有任何新動作公佈過，相信漢傳媒新消息只係時間問題。
漢傳媒喺上年10月底，公佈霆鋒入主炒過一輪後，要到12月初先反覆炒上（留意返，咁啱漢傳媒見底之日，就係趙薇公佈入股阿里影業當日）。隻股早半個月炒高到0.84元後，近期回返去0.6樓上整固，以目前價位算係穩陣，買入等佢好消息。
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文
