智取大市：調整尾聲要貨唔要錢
晉佳先講一個真人真事，係關於小弟兩位朋友喺過去一個星期嘅遭遇。
晉佳兩位朋友，一位叫做C君，佢聽到「丁蟹」兩個字，拿拿臨喺上星期一清貨離場，仲要喺上星期五小注買入滙控（005）熊仔；至於另一位朋友A君，雖然同樣認為大市有機會調整，但同時認為大牛市機不可失
，有理冇理勇字行頭，繼續炒落去。
結果係點？總結6個交易日，C君只係喺上星期五小注買滙控熊仔，噚日滙控夠硬淨，冇升跌，只能打和，但總算跑贏大市；A君又點呢？上星期斬獲相當唔錯，只不過噚日大跌市令到盈利削半，總結六個交易日，全倉依然贏接近一成，表現遠遠跑贏大市。結果，A君完勝。
故事告訴大家一個定律，就係喺牛市三期，只要神願意畀你多一日時間，就有多一日時間畀你贏大鑊。所以，喺牛三，進攻先係最佳嘅防守，防守必定係次一級嘅選擇。
如果你近期每進攻一日，就賺一個月人工，連賺幾日之後，即使一個調整殺到埋身，可能會令你一日內冇咗兩個月人工，但係拉勻都贏到開巷，然後呢條贏錢之路，就可以大漲小回咁循環落去。
上述嘅A君，今次避唔過調整都唔緊要，下次只要喺牛市三期最瘋癲嘅時候，升到嚴重超賣一刻，嚟一個金盤洗手，抽身離場，就能夠學偶像派財演高明所講，笑到最後。
喺牛三必有RSI頂背馳嘅情況下，晉佳相信大市未有耐見頂，睇怕C君回報將會進一步拋離T君。
華富國際趁機上車
理論上，恒指9日RSI由上星期一嘅94.8，跌到去噚日嘅63.5，先至完成第一個RSI頂部同埋第一個調整浪。參考番舊年12月中，滬綜指單日大調整嘅RSI走勢，9日RSI喺65左右已經見底，然後整體大市進入新一輪升浪。換言之，目前港股大約處於舊年12月中A股升浪中途站嘅階段。
手上錢多過貨嘅你，喺噚日就絕對係撈貨黃金機會，或者係一個執靚個倉嘅好機會，問題只係撈咗嘅股，能唔能夠成為他朝嘅強勢股。
其中一個有機會成為強勢股嘅選擇，就係本地券商股。家陣港股成交日日過2,000億元，等於之前成交三倍，本地券商股終極目標價要達到起步位嘅三倍，先至反映實況。
其中，華富國際（952）由0.6元起步，最多只升到0.96元，估計最終炒到1.8元都唔過份，仲要最近配過股，配股價喺0.75元，噚日收0.77元，已經非常接近大戶入場價，輸極有限。
至於股價近幾日由高位回吐20%左右，回吐幅度已夠，目前絕對係理想上車機會。呢隻細價股不妨現價買，目標價穩陣啲打八折左右，都可以睇1.5元，上升空間接近一倍。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
