金手指：不問價追匯星
■楊家聲任主席的匯星印刷，昨日已升穿阻力位。 資料圖片
孫柏文今日叫大家「不問價追匯星印刷（1127）」。曾淵滄博士講得冇錯，市況真係chok啲弱手落車。但就算係咁，繼前周推介過嘅金寶通（320）升到上榜後，上周就到中慧（1143）接棒。點解講呢兩隻細市值股？我
個有十億身家、靠炒股賺番來嘅老炒家朋友，喺2013年同佢幾次深入討論後，推介過三隻冇十億元市值嘅公司，金寶通、中慧、利記（637）。
破阻力位有排升
周末又同老炒家食飯，佢話：「肥仔，揀細價股使乜問我？你大前年再喺《蘋果》寫後，只推介過四隻冇十億市值嘅公司，推介日開市價盲追，揸到今日隻隻賺。而跑贏曬嗰隻，係你叫我買，喺0.6元嘅CEC（759）！」老炒家果然記性好，噚日CEC收2.23元。佢問我仲有冇，我話：「有隻好似0.6元嘅CEC。係實業，做印刷，不過營運有CEC咁破格。」呢隻就係匯星。我話，佢營運到似神話時代嘅滙控（005）。當年，滙控平時會極保守，唔憂做咁揀客，唔理啲跑數基金股東投訴要「進取」。但當地球某處現金融危機，就可賤買資產。匯星就一樣。
匯星做嘅印刷業，全球全行萎縮，啲懶人見行業唔買，故佢市盈率得6倍，派息5厘，市值無十億，股價慢慢升。但就係咁，全球好多陷入困境嘅印刷行，俾匯星賤買。例如舊年買澳洲間Opus，似當年李嘉誠喺滙控手上買和記般。而最強係匯星之後劈走啲蝕錢業務，留賺嘅嘢。例如，電子書確實係好勁，小說銷量仆直，但兒童書籍企硬，因家長怕電子書對小朋友嘅影響。唔知係咪咁，David Webb舊年都不斷增持匯星。一講，老炒家笑話：「你估得阿Webb買咩？」哈！原來佢都買緊。不過，佢話歷史高位1.18元係好大阻力，雖然以現市況好快挑戰，但佢話會難穿。不過一穿，就會有程式買盤湧現同冇蟹貨，脫韁野馬般升。而噚日真係穿咗收1.26元。市盈率去到10倍，就會1.9元，不問價追匯星！
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
