歎冰火 要打底
2015年04月21日
港股昨日市況，可以用七個字去形容，就係︰要跌的終於要跌。上星期五，中證監放風，重新加強規管融資融券(即係孖展同沽空)，跟住港股夜期已經插咗705點，跟住美股開市就鋤低，搞到個個好驚青，怕港股大插。到咗周六，中證監就澄清，話加強規管係原有方向，唔
係要打壓股市，到了星期日，人民銀行仲宣佈埋降準，於是大家又轉驚為喜，覺得個市無事，仲以為個市會升！
早市企硬唔沽就笨
周日寫完報紙篇文交稿後，手痕痕再在陸羽仁的facebook留言，話小心呢種市「先殺淡友，再殺好友」，結果不幸言中。
港股昨日一開真係神奇企硬，期指開市3分鐘一度挾上27931點高位，比上周五夜期高956點，將淡友殺清。可惜，到下晝開市，唔單止港股滑落，連內地股市都一齊腳軟。
呢個狀況表面睇係中國大玩冰火五重天，有人話中國證監會和人民銀行打大交，我傾向從另一角度看，經濟唔好，降準要降到1個百分點咁多，都係逼不得已，內地股市已癲，放咁多水好易更癲，所以中證監把要調控股市的醜話說在前頭，先為股市降溫，係降溫唔係打交。試想若然中證監不是提前出口術，人行一次降準降1個百分點咁多，上證綜指仲唔由4300點抽上4500點？事先煞定車，昨日上證升到4356點就急回，收市跌番1.6%去4217點，都係事先降溫之功。
按照呢個邏輯分析，中央想個市升，但唔想佢升得咁快，月初連串利好政策推出，都係為咗幫大堆不利嘅經濟數據拆彈，當壞數據出得八八九九，利好政策都唔使再推住，甚至想佢個市降吓溫，留番啲子彈等下一輪托市喇。
從大方向來說，個市應該未玩完，但短線睇個市仍然要打打底，無論係A股抑或港股，都要搵搵支持位，咁先至比較健康。投資者係呢兩個星期，習慣了A股式的升市，見到個市調整周身唔聚財，但對已經食了胡或沽了點貨的股民而言，個市回一回，正好係低吸的機會。由於估計調整可能未完成，想買貨者就要睇自己個倉，如果個倉仲有貨，就唔使咁急買，希望博到佢跌一輪，可以買得平啲。
等調整唔急買貨
另外金管局昨日再入市注入23.3億港元，顯示仍有資金流入。雖然有人見資金流入估港股會升，我怕這是短期水尾，彈一彈要再回，因為昨日港股跌得快過內地市，外資好似淡過中資。
睇番大市數據，上證指數重挫1.64%，其中一個講法話上交所交易系統顯示唔到1萬億成交，嚇親投資者咁話，我就怕只是大市調整的藉口。恒指昨日低見26959點，尾市沽盤略收斂，收市重上兩萬七，恒指收造27094點，挫558點；國企指數收報14111點，挫425點，成交金額2110億元，如果早市有食胡，下午就坐定粒六。
藍籌股大致向下。雖然傳匯控(005) 總部計劃重返香港，股價照跌0.1元，造70.45元；焦點港交所(388) 跌11元，造272.6元；騰訊(700) 挫5.7元，造153.1元，單是騰訊已拉低恒指95點。另外，長和(001) 停牌，早上舉行股東特別大會，審議長和收購和黃(013) 及發行新股，以換取赫斯基能源的股份。主席李嘉誠在會議舉行前，被問到是否有信心議案獲通過，李超人話要視乎最終結果，相信應該可通過。
陸羽仁
金融High Tea 舊文
